Fýtzal: Qazaqstan quramasy álem chempıonatynyń irikteý týrnırinde Slovenııamen teń oınady
ASTANA. QazAqparat - Fýtzaldan 2016 jylǵy álem chempıonaty irikteý týrnıriniń ekinshi týrynda Qazaqstan quramasy Slovenııamen 2:2 esebimen teń oınady.
Vesti.kz saıtynan alynǵan málimetke qaraǵanda, oıynnyń 10-mınýtynda qazaqstandyqtardan Shyńǵys Esenamanov birinshi bolyp esep ashty. Biraq bir mınýttan keıin slovenııalyq Rok Mordeı tarazy basyn teńestirip úlgerdi. 19-mınýtta Dáýren Nurǵojın Qazaqstan quramasyn qaıtadan alǵa shyǵardy. Degenmen, 29-mınýtta slovenııalyq Krıstıan Chýets esepti teńestirdi. Eki týrdan keıin tórt upaı jınaǵan Qazaqstan quramasy óz tobynda alda keledi. Qazaqstan quramasy kelesi kezdesýin 13 jeltoqsan kúni Frantsııa oıynshylarymen ótkizedi. Bul Kakaý shákirtteri úshin toptyq kezeńniń sońǵy oıyny bolmaq. Astana ýaqytymen 18.00-de bastalatyn match tikeleı efırde «ON-TV» (burynǵy «Tań»)telearnasynan kórsetiledi. Aıta keteıik, alǵashqy eki oryndy ıelengen komandalar álem chempıonatyna beriletin joldama úshin kúresti aldaǵy jyly jalǵastyrady. 2016 jylǵy naýryz-sáýirde ótetin pleı-off básekelerinen keıin Eýropadan Kolýmbııada 14 qyrkúıek - 2 qazanaralyǵynda ótetin álem birinshiligine baratyn jeti qurama belgili bolmaq. Foto Qaırat FK saıtynan alyndy.
