Fýtzal: «Qaırat» ÝEFA reıtınginde kósh bastap tur
ASTANA. QazAqparat - Almatynyń «Qaırat» fýtzal klýby ÝEFA reıtınginde birinshi orynǵa shyqty. Ótken aptada ÝEFA basshylary kári qurlyqta óner kórsetetin komandalardyń reıtıngin jańartty. Kósh basynda Almatynyń «Qaırat» komandasy tur.
ÝEFA kýbogynyń eki márte jeńimpazy atanǵan almatylyq ujymnyń qorjynynda 50333 upaı bar. «Qaırattan» keıingi orynǵa jaıǵasqan Ispanııanyń «Inter Movıstar» klýbynda 43500 upaı. ÝEFA kýbogynyń qazirgi jeńimpazy Reseıdiń «Gazprom-ıÝgra» komandasy úzdik úshtikti qorytyndylaǵan. Reseılik ujymnyń enshisinde 34000 upaı.
Aldaǵy qarasha aıynda «Qaırat» ÝEFA kýbogy jolyndaǵy básekelerin bastaıdy. Eýropanyń reıtınginde úzdik turǵan almatylyqtar jarystyń negizgi kezeńinde, ıaǵnı, elıtalyq raýndynda qosylady. Oǵan deıin eýropalyq komandalar irikteýdiń eki kezeńinen ótedi. Elıtalyq raýndtyń jerebe tartý rásimi qazan aıynyń 21-inde ótedi.
