Fýtzal: «Qaırat» ÝEFA Chempıondar lıgasynyń fınalynda jeńilip qaldy
NUR-SULTAN. QazAqparat - Búgin Almaty qalasynda fýtzaldan ÝEFA Chempıondar lıgasy máresine jetti. Atalmysh týrnırdiń chempıony men júldegerleri anyqtaldy, dep habarlaıdy QazAqparat tilshisi.
Esterińizge sala ketelik, dúbirli dodada Almatynyń «Qaırat» komandasy baq synady. Qarsylastary - Ispanııanyń «Berselona» jáne «Inter Movıstar», Portýgalııanyń «Sportıng» komandalary.
Atalmysh týrnır buǵan deıin ÝEFA kýbogy dep atalyp kelgen edi. Bıyldan bastap ÝEFA Chempıondar lıgasy ataýyna ıe boldy.
Almatylyqtar 26 sáýirde ótken jartylaı fınalda Ispanııanyń «Barselonasyn» 5:2 esebimen jeńdi. Al odan buryn «Sportıng» klýby «Inter Movıstardy» 5:3 esebimen tize búktirgen edi. Osylaısha fınalǵa «Qaırat» pen «Sportıng» joldama aldy.
Búgingi kezdesýde portýgaldar jınaqy oıyn kórsetti. Olar almatylyq klýbtyń qaqpasyna aldymen eki gol soǵyp ketti. Aldymen 28-mınýtta Kavınato mergendik tanytsa, 27-mınýtta Aleks Merlım esepti ústemeleı tústi. Oǵan almatylyq klýb sapynan 38-mınýtta Dýglas jalǵyz golmen jaýap qaıyrdy. Fınalda «Sportıng» «Qaırattan» 2:1 esebimen basym tústi. Atalmysh komanda óz tarıhynda tuńǵysh ret atalmysh týrnırde chempıondyq ataqqa qol jetkizip otyr. Búgingi kúnge deıin olar eki márte (2011, 2015) fınalǵa shyqty. Degenmen qarsylastaryna ese jiberip, kúmis júldeni qanaǵat tutty. Al «Qaırat» 2013, 2015 jyldarda chempıon atanǵan bolatyn.
Búgin úshinshi oryn úshin saıysta «Barselonanyń» joly boldy. Olar «Inter Movıstar» klýbyn 3:1 esebimin jeńdi.
