Fýtzal: «Qaırat» Qazaqstan kýbogynyń ıegeri atandy
NUR-SULTAN. QazAqparat – Nur-Sultandaǵy «Saıran-Arena» sport kesheninde Almatynyń «Qaıraty» men Taldyqorǵannyń «Jetisý» komandalary el kýbogy úshin synǵa tústi, dep habarlaıdy QazAqparat tilshisi.
Fınalǵa qos komanda da tastúıin daıyndyqpen shyǵyp, baryn saldy.
Birinshi taımda almatylyqtar eki márte «Jetisý» klýbynyń qaqpasyn dál kózdedi. Aldymen ádemi kombınatsııadan keıin Taıebı esep ashsa, kóp uzamaı komanda kapıtany Dáýren Nurǵojınge bos qalǵan qaqpaǵa gol salý qıyn bolǵan joq.
Oıynnyń ekinshi kezeńinde «Qaırattan» Dıego mergendik tanytsa, «Jetisý» sapyndaǵy Everton men Tımýr Baltabaev esepti qysqarta aldy. Biraq Birjan Orazov qaıtadan eki dop aıyrmashylyǵyna jetkizdi – 4:2. Budan keıin Everton taǵy bir goldyń avtory atanǵanymen, taldyqorǵandyqtardyń odan árige shamasy jetpedi.
Osylaısha 4:3 esebimen jeńiske jetken almatylyqtar Qazaqstan kýbogynyń ıegeri atandy. Kaka shákirtteri jartylaı fınalda el kýbogyn ótken jyly jeńip alǵan «Aqtóbe» komandasyn da tize búktirgen bolatyn.
Dáýren Nurǵojın fınaldyq matchtyń úzdik oıynshysy atandy.
