Fýtzal: Búgin jartylaı fınalda «Qaırat» «Barselonamen» kezdesedi
NUR-SULTAN. QazAqparat - Búgin, 1 mamyrda fýtzaldan UEFA Chempıondar lıgasynyń jartylaı fınalynda Almatynyń «Qaıraty» Ispanııanyń «Barselona» komandasymen kezdesedi, dep habarlaıdy QazAqparat tilshisi.
Oıyn elorda ýaqytymen 23.50-de bastalyp, «Qazsport» telearnasynan tikeleı efırde kórsetiledi.
Atalǵan týrnırde komandalar úsh márte kezdesti. Úsheýinde de qazaqstandyq klýbtyń mereıi ústem boldy. Aldymen 2013 jyly jartylaı fınalda «Qaırat» olardy 5:4 esebimen tize búktirdi. Al 2015 jyly qazaqstandyq fýtzalshylar ıspanııalyq klýbty fınalda 3:2 esebimen súrindirdi. 2019 jyly jartylaı fınalda «Barselona» taǵy da «Qaıratqa» 2:5 esebimen jol berdi.
Bıylǵy týrnırdiń shırek fınalynda «Qaırat» Portýgalııanyń «Benfıkasynan» 6:2 esebimen basym tússe, «Barselona» Slovenııanyń «Dobovets» komandasyn 2:0 esebimen jeńdi.
Aıta keterligi, búgingi kezdesýde qazaqstandyq klýbtyń negizgi qaqpashysy Igıta oıynǵa qatysa almaıdy. Ol «Benfıkamen» kezdesýde qyzyl qaǵaz alyp, alańnan qýyldy. Ony 19 jastaǵy Narýn Serikov almastyryp otyr. Al «Barselona» sapynan oıynshy Serhıo Losano men qaqpashy Mıkelıa Feıshas kezdesýden tys qaldy.
Atalǵan týrnırdiń shırek fınaldan bastalǵan oıyndary Horvatııanyǵ Zadar qalasynda ótkizilýde. Jartylaı fınalǵa «Qaırat» pen «Barselonadan» ózge «Inter» (Ispanııa) jáne «Sportıng» (Portýgalııa) komandalary shyqty.
Fınaldyq oıyn 3 mamyrda ótkiziledi.
«Qaırat» 2013, 2015 jyldary chempıon atandy. Al 2019 jyly ekinshi oryn alsa, 2009, 2011, 2017 jyldary úzdik úshtikten kórindi.
