Fýtzal: «Barselona» oıynshysy semeılik klýbtyń sapyna aýysady

ASTANA. KAZINFORM – Ferrao degen laqap atpen tanymal brazılııalyq shabýylshy Karlos Vagner Gýlarte Fılo cemeılik fýtzal klýbynyń oıynshysy atandy. 

Sports.kz portalynyń habarlaýynsha, fýtzaldan álemniń úsh dúrkin úzdik oıynshysy 2014 jyldan beri oınaǵan ıspanııalyq «Barselona» komandasymen qoshtasyp úlgerdi. Ferrao jaqyn arada «Semeı» qataryn tolyqtyrady dep kútilýde. 

33 jastaǵy brazılııalyq oıynshy úsh ret Ispanııa chempıonatyn (2018/19, 2020/21, 2021/22), eki ret Chempıondar lıgasyn jeńip aldy. Sonymen qatar úsh ret álemniń úzdik oıynshysy boldy (2019, 2020, 2021). 

Eske sala ketsek, «Semeı» jaqynda ǵana fýtzaldan Qazaqstan chempıony atanyp, «Qaırattyń» 20 jyldyq gegemonııasyn toqtatqan bolatyn.

Kelesi maýsymda semeılikter UEFA Chempıondar lıgasynda óner kórsetedi.