FÝTZAL: Almatynyń «Qaıraty» ÝEFA kýbogynyń jeńimpazy atandy!
ASTANA. QazAqparat - Portýgalııa astanasy Lıssabonda ÝEFA kýbogy úshin ótken úzdik tórt klýb týrnırinde Almatynyń «Qaıraty» jeńimpaz atandy.
Brazılııalyq maman Kakaý jattyqtyratyn almatylyqtar sońǵy synda Ispanııanyń ataǵy jer jarǵan «Barselona» komandasymen kezdesti. Birinshi taımda «Qaırat» sheberligi men qaıratynyń joǵary ekendigin kórsete bildi. 17-mınýtta qaqpashy Igıta bastaǵan ádemi kombınatsııadan keıin Ýmberto esep ashty. Al 19-mınýtta sol qanattan sýyrylyp shyqqan Lýkaıan birneshe oıynshyny ózimen birge ala ketip, qaqpa shetinde jalǵyz qalǵan Dıvaneıge dál pas berdi. Dıvaneı bul múmkindikti múlt jibergen joq.
Ekinshi taım ıspandyqtardyń basymdylyǵymen bastalyp, «Qaırat» qorǵanýǵa májbúr boldy. Qorǵaýshylar qapy qalǵan sátterde Igıta qaqpasyn aman saqtap, erlik kórsete bildi. Degenmen 30-mınýtta ıspanııalyqtardan Saad esepti qysqartty. Biraq sálden keıin qaqpaǵa týra shyqqan «Qaırattyń» shabýylshysyn shalyp jyqqan «Barselonanyń» oıynshysy alańnan qýyldy. Osy basymdylyqty sátti paıdalanǵan Igor 32-mınýtta esepti 3:1-ge jetkizdi. Degenmen sálden soń «Barselonadan» Lın esepti taǵy qysqartty. Budan keıin ıspanııalyqtar qanshama tyrysqanymen, esep ózgergen joq.
Sóıtip, «Barselonanyń» ózin 3:2 esebimen tize búktirgen «Qaırat» ÝEFA kýbogyn jeńip aldy. Bul - almatylyqtardyń osymen ekinshi jeńisi.
Úshinshi oryn úshin básekede Máskeýdiń «Dınasyn» utqan Lıssabonnyń «Sportıng» komandasy osy týrnırdiń qola júldesin ıelendi.
Aıta keteıik, sońǵy úsh jylda «Barselona» eki márte, «Qaırat» bir ret ÝEFA kýbogynyń jeńimpazy atanǵan bolatyn.
