Fýtzal: Almatynyń «Qaırat» klýby ÝEFA Kýbogy úshin jarystyń fınaldyq kezeńine shyqty

Almatyda ótken «S» tobyndaǵy komandalar arasyndaǵy 2010/20101 jylǵy ÝEFA Kýbogynyń elıtaly kezeńiniń sońǵy sheshýshi matchynda «Qaırat» Grýzııa chempıony «Iberııa Star» komandasymen 2:2 esebimen teń oınady. Bul nátıje almatylyqtardyń ÝEFA Kýbogy úshin jarysta tórteýdiń fınalyna beriletin joldamany ıelenýine múmkindik berdi. Sebebi sheshýshi oıynǵa deıin «Qaırat» ta, «Iberııa Star» da alǵashqy eki matchta jeńiske jetip, birdeı upaı jınap, fınaldyq kezeńge shyǵý múmkindikterin saqtap qalǵan. Tek soǵylǵan jáne jiberip alǵan goldardyń kórsetkishteri boıynsha «Qaırattyń» jaǵdaıy jaqsy boldy. Teń nátıje «Qaırattyń» fınaldyq kezeńine ótýge múmkindik berdi. Aıta keteıik, «S» tobynda sonymen qatar Slovakııanyń «Slov-Matık» jáne Polshanyń «Akademııa» komandalary óner kórsetti. «Qaırat» «Slov-Matıkti» 3:1, al «Akademııany» 5:0 esebimen utty.

Esterińizge salaıyq, «Qaırat» komandasy 2008 jyly ÝEFA Kýbogynyń qola júldesin jeńip alǵan bolatyn. Al byltyr elıtaly kezeńde «D»tobynda synǵa túusken jerlesterimiz ekinshi oryn alyp, Eýropanyń basty klýbtyq trofeıi úshin bolatyn jarystaǵy tórt myqty komandanyń qataryna óte almady. Ázirbaıjannyń Baký qalasynda bolǵan elıtaly kezeńniń matchtarynda «Qaırat» «D» tobynda jergilikti «Araz» komandasyna jol bergen-di.

Jalpy, ÝEFA kýbogy úshin jarys tórt kezeńnen turady. Aldyn ala kezeńde jarysqa 7 topqa bólingen 28 komanda qatysyp, bulardyń jeńimpazdary negizgi kezeńge joldama alady. Bul kezeńde alty topqa bólingen 24 komanda sheberlik baıqasady. Ár toptan úzdik shyqqan eki klýb elıtaly kezeńge joldama alady. Elıtaly kezeńde komandalar tórt topqa bólinedi. Ár toptan úzdiń shyqqan klýbtar ǵana ÝEFA kýbogy úshin jarystyń tórt komandanyń qatysýymen ótetin fınaldyq kezeńine joldama alady.