Fýtbolshylarymyzdyń súreńsiz oıyny depýtattardyń da namysyna tııýde
ASTANA. QazAqparat - Fýtboldan Qazaqstan ulttyq quramasynyń álemdik dodalardaǵy súreńsiz oıyny QR Parlamenti Senatynyń depýtaty Álı Bektaevtyń namysyna tıdi, dep habarlaıdy QazAqparat.
«Biz kóptegen fýtbolshylardy shetten ákelemiz, qymbatqa satyp alamyz. Olardyń barlyǵy jergilikti jerlerde bıýdjet esebinen qarjylandyrylady. Al nátıjesi qandaı? Máselen ótkende álem birinshiliginiń irikteý kezeńi aıasynda Armenııadan jeńildik. Bizde 30 paıyzǵa deıin legıonerler, Armenııada 100 paıyz jergilikti fýtbolshylar oınaıdy. Armenııada 6-aq mıllıon halyq bar. Armenııanyń bıýdjeti Qazaqstannan 10-15 ese az. Sportqa da solaı bólinedi. Al bizde namysqa tıetin osyndaı nátıjelerimiz bar. Men tek bir ulttyq balalaryn jınańdar demeımin. Biraq, Qazaqstandaǵy barlyq ult ókilderimen ózimizdiń jastarymyz oınaıtyn komanda qashan shyǵady?»,- dedi ol QR Parlamenti Senatynyń Áleýmettik-mádenı damý jáne ǵylym komıtetiniń «Dene tárbıesi jáne sport máseleleri boıynsha QR-nyń birqatar zańnamalyq aktilerine ózgertýler men tolyqtyrýlar engizý jónindegi» zań jobasyn talqylaý barysynda.
Onyń atap ótýinshe, elimizde sportty damytýǵa memleket tarabynan mol qarjy bólinýde. Sondyqtan onyń maqsatty jumsalýy jáne naqty nátıjeniń bolýy óte mańyzdy.
«Búgingi qaralǵan zań jobasyna sáıkes osy ýaqytqa deıin sport mektepterine sport basqarmalary nemese mınıstrliktiń bólimderi arqyly bólingen qarajat endi qoǵamdyq uıymdarǵa beriledi. Ol uıymdardyń barlyǵy qoǵamdyq uıymdar. Olar buryn-sońdy mundaı úlken qarajatpen jumys jasamaǵan. Sondyqtan qoǵamdyq uıymdardyń, federatsııalardyń memleket qarajatyn jumsaýyna baqylaýdy kúsheıtý qajet dep oılaımyn. Sporttyq negizgi kórsetkishteriniń sońynan júgirip júrip qarajattyń maqsatty paıdalanýyn joǵaltyp almaýymyz kerek»,- dedi Bektaev.
