Fýtbolshy sońǵy ret pas berdi de alańda jan tapsyrdy
ASTANA. QazAqparat - KSRO quramasy jáne Kıevtiń «Dınomosy» komandasynyń burynǵy oıynshysy Andreı Bal jasy 57-ge qaraǵan shaǵynda kenetten kóz jumdy. Ol óziniń joǵarydaǵy eki quramda birge oınaǵan áriptes dosy Vladımır Bessonovtyń qolynda, fýtbol alańynda jan tapsyrdy. Bul týraly Eurosport-qa siltememen egemen.kz habarlady.
«Biz, ardagerler retinde, jyldar boıy qalyptasqan dástúrimizge saı, kúndizgi saǵat 11-de ortalyq stadıon alańdarynyń birinde jınalǵan edik. Andreı týra meniń qolymda óldi deýime bolady. Ol pas berdi de kenet eshkimmen qaqtyǵyspastan, qulaı ketti», - dedi Bessonov oqıǵa oryn alǵannan keıin.
«Andreı Bal asa kórnekti fýtbolshy jáne syıly adam edi. Onyń ashyq-jarqyn minezi, qarapaıymdylyǵy, kóńildiligi erekshe edi... Ol árqashan ujymnyń sáni bolatyn. Kópshilik arasynda árdaıym qasyndaǵylardyń rýhyn kóterip júretin. Biz onymen 1976 jyly KSRO-nyń jasóspirimder quramasy sapynda Eýropa chempıonatyn, kelesi jyly álem birinshiligin jeńip alǵaly beri birge kelemiz. Andreı bekerden-beker komanda kapıtany bolǵan joq. Ol qashanda alda, alǵy shepte júretin. Ókinishtisi, ómirden erte ketip barady. Ol áli bul dúnıede, ásirese, fýtbolda talaı nárse jasaıtyn edi», - dedi burynǵy áriptesi.
Bal 1958 jyly 16 aqpanda Lvov oblysynyń Rozdol poselkesinde týǵan. Qorǵanys pen jartylaı qorǵanys shepterinde oınady. Fýtbolshylyq mansabynyń basym bóligin Kıevtiń «Dınamosynda» ótkizdi. KSRO quramasy sapynda 1981-1989 jyldary oınady. 1982 jáne 1986 jyldary álem chempıonattaryna qatysty. KSRO-nyń 1981, 1985, 1986 jáne 1990 jyldarǵy 4 dúrkin chempıony. KSRO Kýbogynyń 4 retki (1982, 1985, 1987, 1990) ıegeri. Kýbok ıeleri kýbogynyń 1986 jylǵy jeńimpazy.
Sońǵy jyldary Andreı Bal Kıevtiń «Dınamo» komandasy qurylymynda jattyqtyrýshynyń assıstenti, jattyqtyrýshy-selektsıoner bolyp qyzmet etti.
