Fýtbolshy Samat Smaqov sporttan ketýi múmkin
ASTANA. QazAqparat - Qazaqstannyń sońǵy jıyrma jyldaǵy úzdik fýtbolshylarynyń biri - Samat Smaqov sporttyq mansabyn aıaqtaý qarsańynda tur, dep habarlaıdy «SPORTINFORM» SAA tilshisi.
39 jastaǵy Samat Smaqov Jańa jyl merekesinen keıin jasyl alańǵa oralmaıtyny jaıly málimdeme jasaýy múmkin. Oǵan jaraqat nemese oıynshynyń dene qýaty emes, basshylyq qyzmetterden kóptegen usynystardyń túsýi sebep bolyp otyr. S. Smaqovty Premer-lıganyń úsh birdeı klýby jáne Qazaqstan Fýtbol federatsııasy qyzmetke shaqyrýda. Osyǵan oraı, aty ańyzǵa aınalǵan fýtbolshy qazir usynystardy qarastyrýda.
«Qazir eshteńe aıta almaımyn, Jańa jyldan keıin telefon shalyńyz, sol kezde bári anyq bolady. Sheshimim týraly eń aldymen sizder habardar bolasyzdar», - dep telefon suhbatyn qysqa qaıyrdy fýtbolshy.
Samat Smaqov Qazaqstan quramasy sapyndaǵy oıyndar sany boıynsha rekordshy (75 oıyn) ári eldegi eń kóp júlde alǵan fýtbolshylardyń biri. Ol alty ret el chempıony atanǵan. Bul kórsetkish boıynsha dosy Andreı Bogomolov qana jeti altyn medalmen onyń aldynda tur. Kásibı mansaby barysynda tájirıbeli fýtbolshy «Elimaı», «Ertis», «Rostselmash» (Reseı), «Jeńis», «Qaırat», «Aqtóbe» jáne «Rızespor» (Túrkııa) klýbtarynda óner kórsetken. Al sońǵy bir jarym jyly Shymkenttiń «Ordabasy» komandasynda ótti.
