Fýtbolshy Neımarǵa operatsııa jasaldy

ASTANA. QazAqparat - «Parı Sen-Jermen» klýbynyń fýtbolshysy Neımar da Sılva Santos Jýnıordyń jaraqattanǵan tobyǵyna operatsııa jasalyp, ol ońaltý kýrsyn bastady, dep habarlaıdy QazAqparat atalǵan klýbtyń resmı saıtyna silteme jasap.

Operatsııa Katarda jasalǵan.

«Búgingi medıtsınalyq málimet oń jaq tobyǵyn jaraqattap alǵan Neımarǵa qatysty. Oǵan Dohadaǵy Aspetar aýrýhanasynda ota sátti jasaldy», - delingen aqparatta.

Neımar 19 aqpan kúni Frantsııa chempıonaty aıasynda «Lıllmen» bolǵan matchta býyn sińiriniń sozylýynan oıynnan shyǵyp qalǵan edi. Buǵan deıin 31 jastaǵy Neımar 3-4 aı ońalyp, bıylǵy maýsym sońyna deıin alańǵa oralyp úlgermeıtini týraly jazylǵan bolatyn.

Bıylǵy maýsymda Neımar túrli týrnırler aıasynda 29 matchta oınady. Nátıjesinde 18 gol soǵyp, golmen aıaqtalǵan 17 sátti pas berdi. Ótken jyldyń sońynda ol Brazılııa quramasynyń sapynda Katardaǵy Álem chempıonatyna qatysty.