Fýtbolshy Lýka Modrıch 5 jasynda túsken fılm jelige tarady
ASTANA. QazAqparat - Reseıde ótip jatqan 2018 jylǵy Álem chempıonatynyń fınaly qarsańynda qoı baqqan Lýka Modrıchtiń vıdeosy ınternetti sharlap ketti, dep habarlaıdy QazAqparat tilshisi.
Horvatııa ulttyq quramasynyń kapıtany Lýka Modrıch bes jasynda rejısser Pavle Belenovıchtiń qasqyrlar týraly derekti fılmine túsken. Bul týraly The Sun basylymy jarııalady.
The Sun basylymy kishkentaı balanyń shynymen Lýka Modrıch pe, joq pa - sony anyqtaý maqsatynda horvatııalyq rejısser Pavle Belenovıchke júgingen. Basylymǵa bergen suhbatynda Belenovıch muny rastap, Modrıchter otbasymen dos bolǵanyn aıtty.
«Men bala kezden tabıǵatqa, taýlarǵa, janýarlarǵa, ásirese qasqyrlarǵa qatty qyzyqtym. 1990 jyly Velebıt taýlarynda qasqyrlar týraly derekti fılm túsirdik. Men Modrıchter otbasyna kóp barýshy edim. Sondyqtan da kezekti fılmimde dosym men onyń qoı baqqan kishkentaı ulyn da túsirdim. Keıin soǵys bastaldy. Shaıqastardyń birinde Modrıchterdiń úıi qırap, olar Zatonǵa kóshýge májbúr boldy. Sonan soń olarmen baılanysymyz úzilip qaldy. Kóp jyldar ótken soń qoı baqqan kishkentaı balanyń úlken fýtbolshy bolyp óskenin bildim», - deıdi rejısser.
Aıta keteıik, búgin fınaldyq kezdesýde 33 jastaǵy Modrıch bastaǵan Horvatııa quramasy Frantsııamen kezdesedi.
Foto: ria.ru
