Fýtboldan joldastyq kezdesýde Qazaqstan Armenııaǵa ese jiberdi

ASTANA. KAZINFORM — Búgin, 7 maýsymda fýtboldan Qazaqstan jáne Armenııa quramalary arasynda joldastyq kezdesý ótti.

Atalǵan kezdesýde Qazaqstan quramasy bas bapkeri mindetin atqarǵan Rýslan Baltıev negizgi quramǵa tájirıbeli oıynshylardy qosty.

Qaqpany Igor Shatskııge senip tapsyrsa, qoǵanys shebinde ıAn Vorogovskıı, ​​Nuraly Álip, Álibek Qasym, Aleksandr Marochkın, Erkin Tapalov oıyn kórsetetin boldy.

Jartylaı qorǵanysqa Ádilet Sadybekov, Ashat Taǵybergen, Elhan Astanov, Ramazan Orazov shyqsa, shabýyl shebinde Maksım Samorodov boı kórsetti.

Alǵashqy mınýttarda armenııalyq fýtbolshylardyń belsendiligi baıqalyp turdy.

Osyndaı sátterdiń birinde qazaqstandyq Aleksandr Marochkın 4-mınýtta óz qaqpasyna gol soǵyp aldy.

Qazaqstan quramasy sapynan budan keıin Maksım Samorodov, Elhan Astanov gol soǵatyn birneshe múmkindikti múlt jiberip aldy. 

Ekinshi kezeńde qaıtadan armenııalyq fýtbolshylar tizgindi óz qolynda ustaýǵa tyrysty.

Olardyń qatarynan Vagan Bıchahchıan 58-mınýtta esepti ústemeledi. 

Oıynnyń 94-mınýtynda Armenııa qaqpasyna belgilengen penaltıden Baýyrjan Islamhan sheber oryndady.

Osylaısha Qazaqstan quramasy qarsylasyna 1:2 esebimen ese jiberdi.

FIFA reıtıngisinde Qazaqstan 103-orynda tursa, Armenııa 95-orynda keledi. 

Sondaı-aq el quramasy 11 maýsymda Ázerbaıjanmen joldastyq kezdesý ótkizedi.

Eske salsaq, ÝEFA Ulttar lıgasynyń 2024/25 maýsymynda Qazaqstan V lıgasynda Avstrııa, Norvegııa jáne Slovenııa quramalarymen birge úshinshi topta oınaıdy.