Fýtboldan jastar quramasy búgin Qyrǵyzstanmen joldastyq kezdesý ótkizedi
NUR-SULTAN. QazAqparat - Elimizdiń 21 jasqa deıingi jastar quramasy búgin, 24 naýryzda Qyrǵyzstanmen joldastyq kezdesý ótkizedi, dep habarlaıdy QazAqparat tilshisi.
Oıyn Talǵardaǵy ulttyq quramanyń bazasynda bolady.
Aıta ketsek, jastar quramasy 2023 jylǵy Eýropa chempıonatynyń irikteý týrnırinde kezekti oıynyna daıyndyqty 18 naýryz kúni bastady.
Qaırat Nurdáýletov jetekshilik etetin qurama Qyrǵyzstan olımpıadalyq quramasymen joldastyq match ótkizýdi josparlap otyr.
Kezdesýdiń bastalýy elorda ýaqytymen 17:00-ge belgilengen. Eki jaqtyń kelisimi boıynsha oıynnan tikeleı kórsetilim bolmaıdy.
Aıta keteıik, Qazaqstan Eýropa chempıonatynyń irikteý týrnırinde 29 naýryzda Shotlandııamen kezdesedi.
Eske salsaq, irikteý týrnırinde Qazaqstan jastar quramasy I tobynda Belgııa, Danııa, Shotlandııa jáne Túrkııamen synǵa túsýde.
Aıta keter bolsaq, búgin fýtboldan Ulttar lıgasynda ótpeli oıynda Qazaqstan men Moldova kezdesedi.
