Fýtboldan jasóspirimder lıgasy: «Qaırat» jastarynyń qarsylasy belgili boldy
NUR-SULTAN. QazAqparat - Shveıtsarııanyń Non qalasynda UEFA Jasóspirimder lıgasy 1/32 fınalnyń jerebesi tartyldy, dep habarlaıdy QazAqparat tilshisi.
Týrnırdi ótkizý formaty jańa nusqada qaralyp otyr. Jeńimpaz komanda bir oıyn nátıjesi boıynsha anyqtalady. Pleı-off kezeńiniń alǵashqy satysyndaǵy oıyndar 2 jáne 3 naýryz kúnderine belgilengen.
Jarystyń 1/32 jáne 1/16 fınaldyq kezeńiniń oıyndary eki baǵytta júrgiziledi. Alǵashqysy árbir eldiń chempıondary arasynda ótkizilse, ekinshisi Chempıondar lıgasy jolymen júzege asady. 1/8 fınalda bul joldar biriktiriledi.
Esterińizge sala ketelik, bıyl atalǵan týrnırde Almatynyń «Qaırat» komandasynyń jas fýtbolshylary baq synaıdy. Qazaqstandyq klýb oıynshylary árbir eldiń chempıondary jolymen qatysady. Qarsylasy - Moldavanyń «Sherıf» klýbynyń jastary. Oıyn sol memlekette ótkiziledi.
Atalǵan týrnır 2013 jyldan beri turaqty túrde ótkizilip keledi. Búgingi kúnge deıin Anglııanyń «Chelsı» jáne Ispanııanyń «Barselona» komandalary eki-ekiden chempıon atandy. Al Avstrııanyń «Zaltsbýrg», Portýgalııanyń «Portý» jáne Ispanııanyń «Real Madrıd» komandalary bir-birden jeńimpaz boldy.
Aıta keteıik, 2015/2016 jylǵy kezeńde oǵan elimizdiń atynan elordalyq «Astana» jastary qatysty. Olar S tobynda Portýgalııanyń «Benfıka», Ispanııanyń «Atletıko Madrıd» jáne Túrkııanyń «Galatasaraı» komandalarymen synǵa túsip, tórtinshi oryndy mise tutty.
