Fýtboldan Ulttyq quramanyń bas bapkeri Qazaqstan azamattyǵyn ala ma

ASTANA. QazAqparat – Soltústik Irlandııaǵa qarsy match aldyndaǵy baspasóz máslıhatynda el quramasynyń bas bapkeri Magomed Adıev Qazaqstan azamattyǵyn alý usynysyna qatysty pikir bildirdi, dep habarlaıdy QazAqparat tilshisi.

«Azamattyqqa keletin bolsaq, bul baǵytta áńgimeler áli jalǵasýda. Biz sóılesip jatyrmyz jáne federatsııa basshylyǵy meniń azamattyq alǵanymdy qalaıdy, ony alýyma bastama jasaǵysy keledi. Biraq biz bul máseleni keıinge qaldyryp, qazir oıyndarǵa den qoıyp otyrmyz. Endi matchtan keıin kóreıik. Men utyla bastasam azamattyq bylaı tursyn, elden qýady», - dedi Magomed Adıev BAQ ókilderiniń saýalyna jaýap bere otyryp.

Sondaı-aq bas bapker Soltústik Irlandııamen match aldynda Qazaqstan quramasynyń sapynda ózgeris jasalatynyn aıtty.

Qazaqstan - Soltústik Irlandııa oıyny 10 qyrkúıek kúni elordadaǵy «Astana-Arena» stadıonynda ótedi. Bastalýy – saǵat 19.00-de. Kezdesýdi «Qazsport» telearnasynan, sondaı-aq EKSPO aýmaǵyndaǵy jazǵy sahnadan tikeleı kórýge bolady.

Eske salaıyq, 7 qyrkúıekte Qazaqstan fýtbol quramasy 2024 jylǵy Eýropa chempıonatyna irikteý týrnıri aıasynda Fınlıandııa quramasymen kezdesip, 0:1 esebimen jeńilip qalǵan edi.