Fýtboldan Ulttar lıgasynyń tuńǵysh chempıony anyqtaldy
NUR-SULTAN. QazAqparat - Fýtboldan ÝEFA Ulttar lıgasy fınaldyq kezeńi máresine jetti. Eýropa qurlyǵynda alǵash ret ótkizilgen týrnırdiń tuńǵysh chempıony anyqtaldy, dep habarlaıdy QazAqparat tilshisi.
Fınalda Portýgalııa men Gollandııa quramalary kezdesti. Eki qurama tarapynan tartysty oıyn órbidi. Degenmen esep ekinshi kezeńniń 60-mınýtynda ashyldy. Portýgalııa sapynan Gonsalý Gýedesh osylaısha óz quramasyn alǵa shyǵardy.
Qos qurama da tolaıym tabystarǵa qol jetkizgen. Gollandııa quramasy 1988 jyly Eýropa chempıony ataǵyn jeńip alsa, atalmysh básekede tórt márte qola (1976, 1992, 2000, 2004) júldeger boldy. Olar álem chempıonatynda úsh márte kúmis (1974, 1978, 2010), bir márte qola (2014) medal aldy.
Al Portýgalııa 2016 jyly Eýropa chempıony bolsa, atalmysh birinshilikte bir márte kúmis (2004), úsh márte qola (1994, 2000, 2012) medalge qol sozdy.
Esterińizge sala ketelik, fýtboldan ÝEFA Ulttar lıgasy fınaldyq kezeńiniń jartylaı fınalynda Portýgalııa Shveıtsarııany negizgi kezeńde, Gollandııa Anglııany overtaımda 3:1 esebimen tize búktirdi.
Esterińizge sala ketelik, bul báseke alǵash ret byltyrdan bastap oınaldy. ÝEFA quramyndaǵy 55 qurama tórt lıgaǵa bólindi. Onyń árbirinde tórt-tórt toptan bar. A lıgasynda top úzdikteri atanǵan quramalar fınaldyq kezeńge joldama aldy.
Qazaqstan quramasy ÝEFA Ulttar lıgasynyń D lıgasynda A tobynda Grýzııa, Latvııa jáne Andorra quramalarymen sheberlik baıqasty. Nátıjesinde aldyna Grýzııany salyp, óz tobynda ekinshi oryndy qanaǵat tutty.
