Fýtboldan Ulttar lıgasynda Qazaqstan Belarýspen teń tústi
NUR-SULTAN. QazAqparat - Fýtboldan UEFA Ulttar lıgasynyń úshinshi týrynda Qazaqstan kezekti oıynyn syrt alańda Belarýske qarsy ótkizdi, dep habarlaıdy QazAqparat tilshisi.
Oıyn barysynda qazaqstandyq fýtbolshylar tizgindi óz qolyna alýǵa tyrysty. Nátıjesinde birinshi kezeńniń 13-mınýtynda Abat Aıymbetov mergendigimen kózge tústi. Bul - Abattyń atalǵan týrnır barysynda soqqan úshinshi goly. Budan buryn óz alańyndaǵy Ázerbaıjanmen kezdesýde ol qos goldyń avtory atanǵan bolatyn.
Ekinshi kezeńde Belarýs quramasy tarazy basyn teńestirýge umtyldy. Oıynnyń 85-mınýtynda belarýstik Vladıslav Malkevıch gol soǵyp ketti.
Kezdesýde quramalar 1:1 esebine qanaǵat bildirdi.
Endi Qazaqstan 13 maýsymda óz alańynda Slovakııany qabyldaıdy.
Úsh oıynnan keıin Qazaqstan 7 upaımen kósh basynda keledi.
Aıta ketsek, budan buryn S lıgasy úshinshi tobynda Qazaqstan Ázerbaıjan men Slovakııany 1:0 esebimen tize búktirdi.
Eske salsaq, atalǵan topta óz alańynda Ázerbaıjan Slovakııaǵa 0:1 esebimen jol berdi.
