Fýtboldan Ulttar lıgasy: Qazaqstan Lıtvanyń osal tusyn taba ala ma
NUR-SULTAN. QazAqparat - Búgin fýtboldan UEFA Ulttar lıgasynda Qazaqstan quramasy syrt alańda Lıtvamen sheberlik baıqasady, dep habarlaıdy QazAqparat tilshisi.
Esterińizge sala ketelik, qazaqstandyq fýtbolshylar S lıgasy tórtinshi tobynda synǵa túsedi. Qarsylastary - Albanııa, Belarýs jáne Lıtva quramalary. Toptyń jeńimpazy aldaǵy jyldarda V lıgasynda baq synaýǵa múmkindik alady.
Mamandar búgingi kezdesýde Qazaqstan quramasy jeńiske jetýine barlyq múmkindik bar ekenin aıtady. Lıtva fýtbolshylary búgingi kúnge deıin joǵary jetistigimen kózge túse qoıǵan joq. Álem jáne qurlyq birinshiligi irikteý kezeńinde negizinen tómengi oryndardy mise tutyp júr. Sondyqtan búgingi kezdesýde qazaqstandyq quramanyń jeńiske jetýine qolaıly jaǵdaı týyp turǵan jaıy bar.
FIFA-nyń aıma-aı jarııalanatyn reıtınginde Lıtva quramasy qazir 131-orynda tur. Al Qazaqstan ol reıtıngte 118-orynda keledi. Eki qurama buǵan deıin bir márte ǵana kezdesti. 2014 jyldyń 5 naýryzynda Túrkııanyń Antalıa qalasynda ótken joldastyq kezdesýde ekeýi 1:1 esebine qanaǵat bildirip tarqasty. Sol sebepti búgingi oıyn tuńǵysh resmı kezdesý sanalady.
Lıtva quramasy 1923-1940 jyldar arasynda derbes el retinde túrli jarysta baq synap keldi. Odan keıin Keńes odaǵy quramynda boldy. Qanshama sheber fýtbolshylar KSRO quramasy sapynda oıyn kórsetti. 1990 jyldan beri qaıtadan táýelsiz memleket retinde Lıtva quramasy bedeldi básekelerde baq synap keledi.
Lıtva quramasy sapyndaǵy fýtbolshylardyń basym bóligi óz eliniń chempıonatynda oınaıdy. Sondaı-aq, Bolgarııa, Izraıl, Italııa, Latvııa, Polsha, Serbııa, Estonııa, Horvatııa chempıonattarynda baq synap júrgen fýtbolshylar bar. Al úsh fýtbolshy Qazaqstan Premer-lıgasynda oıyn kórsetedi. Atap aıtqanda, Petropavldyń «Qyzyljarynda» Vıtaýtas Andrıýshkıavıchıýs, Taldyqorǵannyń «Jetisýynda» Artýras Jýlpa, Jambyl oblysynyń «Tarazynda» Ovıdııýs Verbıtskas bar.
Lıtva men Qazaqstan quramalary arasyndaǵy kezdesý elorda ýaqytymen 22.00-de bastalady. Oıyn «Qazsport» telearnasynan tikeleı efırde kórsetiledi. Sondaı-aq, búgin atalǵan toptaǵy Belarýs jáne Albanııa quramalary ózara sheberlik baıqasady.
Qazaqstan quramasy kelesi oıynda 7 qyrkúıek kúni Almatyda Belarýs quramasyn qabyldaıdy.
Aıta keteıik, fýtboldan Qazaqstan jastar quramasy 3 qyrkúıekte Chernogorııaǵa jeńilip qaldy.
Foto: kff.kz