Fýtboldan Ulttar lıgasy: Qazaqstan quramasy Belarýsten jeńilip qaldy
NUR-SULTAN. QazAqparat - Búgin UEFA Ulttar lıgasynyń ekinshi týrynda Qazaqstan óz alańynda Belarýs quramasyn qabyldady, dep habarlaıdy QazAqparat tilshisi.
Atalǵan kezdesýde qos qurama shamalas oıyn kórsetti. Birinshi kezeńde eki qurama bir-biriniń qaqpasynan sańylaý taba alǵan joq. Birinshi kezeń 0:0 esebimen teń aıaqtaldy.
Ekinshi kezeńde belarýstik fýtbolshylar alǵa lap qoıdy. Nátıjesinde olardyń qatarynan Maksım Bordachev esep ashyp ketti. Budan ári qazaqstandyqtar tarazy basyn teńestirýge umtyldy. Qazaqstandyq shabýylshy Abat Aıymbetov 62-mınýtta gol soqty. Budan keıin de alań ıeleriniń gol soǵatyn birneshe múmkindigi bolǵan edi. Degenmen 86-mınýtta Vıtalıı Lısakovıch Belarýs quramasyn taǵy alǵa shyǵardy. Osylaısha Qazaqstan fýtbolshylary qarsylasynan 1:2 esebimen jeńilip qaldy.
Budan buryn eki qurama 2010 jyly Eýropa chempıonatyna irikteý satysynda kezdesti. Eki kezdesýde de qazaqstandyqtar olarǵa 1:5, 0:4 esebimen jeńilip qaldy.
Belarýs fýtbol federatsııasy 1989 jyly qurylǵan. 1992 jyly FIFA músheligine qabyldansa, 1993 jyldan bastap UEFA quramynda baq synap keledi. Sodan bergi ýaqytta atalǵan qurama joǵary jetistigimen kózge túse qoıǵan joq. Eýropa qurlyǵyndaǵy ortanqol qurama qatarynda sanalady.
Qazaqstan quramasy 4 qyrkúıekte syrt alańda Lıtvany 2:0 esebimen jeńip qaıtty. Osylaısha dop dodasyn sátti bastady. Al Belarýs óz alańynda Albanııaǵa 0:2 esebimen ese jiberdi. Týrnır kestesinde qazaqstandyq fýtbolshylar Albanııa quramasy ekeýi alǵashqy eki oryndy ózara bólisip tur.
