Fýtboldan Ulttar lıgasy: Qazaqstan quramasy alǵashqy oıynda Moldovany jeńdi
NUR-SULTAN. QazAqparat - Fýtboldan UEFA Ulttar lıgasy ótpeli satysynyń alǵashqy oıynynda Qazaqstan quramasy Moldovany jeńdi, dep habarlaıdy QazAqparat tilshisi.
Qazaqstan quramasy sapynda alǵashqy mınýttan Shatskıı, Súıimbaev, Álip, Malyı, Marochkın, Bystrov, Nárzildaev, Taǵybergen, Vasılev, Zaınýtdınov, Şetkın shyqty.
Búgingi kezdesýdi qos qurama belsendi bastady. Alǵashqy mınýtta-aq qazaqstandyqtar tarapynan gol soǵatyn birneshe múmkindik bolǵan edi. Ýaqyt óte kele moldovalyq fýtbolshylardyń belsendiligi arta tústi. Nátıjesinde olardyń qatarynan Ion Nıkolaeský 45-mınýtta mergendik tanytty.
Ekinshi kezeńde eki qurama alǵa qaraı umtyldy. Qazaqstandyq fýtbolshylar tarazy basyn teńestirýge kúsh salsa, moldovalyqtar basymdyqty arttyra túsýge nazar aýdardy. Nátıjesinde qazaqstandyq Sergeı Malyı 63-mınýtta gol soqsa, 79-mınýtta alań ıeleri sapynan Vıacheslav Posmak óziniń qaqpasyna gol soǵyp aldy.
Eki qurama jarystyń atalǵan satysynda 29 naýryzda taǵy bir márte kezdesedi. Jeńimpaz qurama aldaǵy kezeńde S lıgasyndaǵy ornyn saqtap qalsa, jeńilgeni D lıgasynda synǵa túsedi.
