Fýtboldan Ulttar lıgasy: Qaı quramanyń baǵy janady
NUR-SULTAN. QazAqparat - Búgin fýtboldan ÝEFA Ulttar lıgasynyń fınaldyq kezeńi bastalady. Atalmysh básekede tórt qurama - Anglııa, Gollandııa, Shveıtsarııa jáne Portýgalııa synǵa túsedi, dep habarlaıdy QazAqparat tilshisi.
Fýtboldan ÝEFA Ulttar lıgasynyń fınaldyq kezeńi Portýgalııada ótkiziledi. Oıyndar Portý jáne Gımaraınsh qalalarynda 5-9 maýsym aralyǵynda bolady.
Esterińizge sala ketelik, bul báseke alǵash ret byltyrdan bastap oınaldy. ÝEFA quramyndaǵy 55 qurama tórt lıgaǵa bólindi. Onyń árbirinde tórt-tórt toptan bar. A lıgasynda top úzdikteri atanǵan quramalar fınaldyq kezeńge joldama aldy.
A lıgasynyń birinshi tobynda Gollandııa Frantsııa men Germanııany artqa tastap ketti. Al Shveıtsarııa Belgııa men Islandııany orta jolda qaldyrdy. Portýgalııa úshinshi toptyń úzdigi atanyp, Italııa men Polshany artqa saldy. Tórtinshi topta Anglııa Ispanııa men Horvatııaǵa des bergen joq.
Atalmysh quramalar arasynda Anglııa, Gollandııa men Portýgalııa tolaıym tabystarǵa qol jetkizgen. Anglııa 1966 jyly álem chempıony ataǵyna qol jetkizse, 1968 jáne 1996 jyldary Eýropa birinshiliginde qola júldeger atanǵan. Al Portýgalııa 2016 jyly Eýropa chempıony bolsa, atalmysh birinshilikte bir márte kúmis (2004), úsh márte qola (1994, 2000, 2012) medalge qol sozdy. Al Gollandııa quramasy 1988 jyly Eýropa chempıony ataǵyn jeńip alsa, atalmysh básekede tórt márte qola (1976, 1992, 2000, 2004) júldeger boldy. Olar álem chempıonatynda úsh márte kúmis (1974, 1978, 2010), bir márte qola (2014) medal aldy. Al Shveıtsarııa quramasy ázirge mundaı jetistigimen maqtana almaıdy. Álem jáne Eýropa birinshilikterinde shırek jáne 1/8 fınal satysynan asa almaı júr.
Fýtboldan ÝEFA Ulttar lıgasynyń fınaldyq kezeńi búgin Portý qalasynda Portýgalııa men Shveıtsarııa quramalary arasyndaǵy kezdesýmen bastalady. Erteń, 6 maýsymda Gımaraınsh qalasynda jasyl alań tórinde Gollandııa men Anglııa quramalary sheberlik baıqasady. Al 9 maýsymda Portýda chempıon anyqtalsa, Gımaraınshta qola júldeger belgili bolady.
ÝEFA Ulttar lıgasynyń fınaldyq kezeńinde Portýgalııa quramasyn bas júldeden negizgi úmitker retinde sanaıdy. Degenmen Gollandııa jáne Anglııa da tájirıbeli fýtbolshylaryn dúbirli dodaǵa alyp bardy. Shveıtsarııa da ońaı shaǵylatyn jańǵaq emes ekenin eskere ketkenimiz artyq emes.
Esterińizge sala ketelik, Qazaqstan quramasy ÝEFA Ulttar lıgasynyń D lıgasynda A tobynda Grýzııa, Latvııa jáne Andorra quramalarymen sheberlik baıqasty. Nátıjesinde aldyna Grýzııany salyp, óz tobynda ekinshi oryndy qanaǵat tutty.
