Fýtboldan UEFA Ulttar lıgasynda Ázerbaıjan alǵash ret jeńiske jetti
NUR-SULTAN. QazAqparat - Fýtboldan UEFA Ulttar lıgasynda Qazaqstan quramasy synǵa túsetin toptaǵy taǵy bir oıynnyń nátıjesi belgili boldy, dep habarlaıdy QazAqparat tilshisi.
S lıgasy úshinshi tobyndaǵy taǵy bir kezdesýde Ázerbaıjan men Belarýs sheberlik baıqasty.
Eki qurama atalǵan týrnırdi sátsiz ótkizip keledi. Úsh týrdan keıin úshinshi jáne tórtinshi oryndardy ózara bólisip turǵan edi. Ekeýi de ázirge jeńiske jete almaı júrgen bolatyn.
Búgingi oıynda qos quramanyń da jeńiske jetý múmkindigi joǵary boldy. Bir-biriniń qaqpasy mańynda jıi shabýyl uıymdastyrdy. Birinshi kezeńde qaqpa qulpy ashylǵan joq.
Oıynnyń ekinshi kezeńinde ázerbaıjandyq fýtbolshylar qarsylas qurama qaqpasy mańynda jıi boı kórsetti. Nátıjesinde 76-mınýtta Mahır Emrelı mergendik tanytsa, 90-mınýtta Ramıl Sheıdaev oıynnyń núktesin qoıdy.
Osylaısha Ázerbaıjan qaosylasynan 2:0 esebimen basym tústi.
Eske salsaq, búgin atalǵan topta Qazaqstan quramasy óz alańynda Slovakııany súrindirdi.
Odan buryn qazaqstandyq fýtbolshylar Ázerbaıjandy 2:0, Slovakııany 1:0 esebimen tize búktirse, Belarýspen 1:1 esebimen teń tústi.
