Fýtboldan týrnırge jınalǵan el jýrnalısteri Túrkistandy aralap kórdi
TÚRKІSTAN. QazAqparat - Túrkistan oblysynda fýtboldan jýrnalıster arasyndaǵy respýblıkalyq týrnır qatysýshylary úshin baspasóz-týry uıymdastyryldy. Bul týraly Óńirlik kommýnıkatsııalar qyzmetinen málim etti, dep habarlaıdy QazAqparat.
«Jańarǵan Túrkistan» atty týrnırge qatysýshy komandalar aldymen, Qoja Ahmet ıAsaýı kesenesine táý etti. Keıin, bokstan Olımpıada chempıony, Túrkistan topyraǵynyń týmasy Bekzat Sattarhanovtyń, chempıonmen irgeles jatqan birtýar qalamger Sadyqbek Adambekovtiń jáne belgili aqyn Qanybek Sarybaevtyń rýhyna quran baǵyshtady.
Sondaı-aq respýblıkanyń túkpir-túkpirinen jarysqa kelgen jýrnalıster «Rýhanı jańǵyrý» baǵdarlamasy aıasynda Túrkistan oblysynyń kıeli oryndaryn aralady. Otyrar aýdanyna aıaldaǵan olar Arystan bab kesenesine zııarat etip, kóne Otyrar qalashyǵynyń shejireli tarıhyn eske túsirdi.
Budan bólek, oblys maqtanyshyna aınalǵan iri kásiporyndardyń, Ordabasy aýdanyndaǵy «Aleksandrovskıı sad» JShS-nyń, «Bórte-mılka» sút taýarly fermasynyń jumysymen tanysty. 
«Aleksandrovskıı sad» Uıalyjar aýylynda 17 gektar jerge ornalasqan. JShS jańa tehnologııany paıdalana otyryp, tamshylatyp sýarý ádisimen kún ótkizbeıtin tor tartý arqyly baý (alma) egýdi qolǵa alǵan. Al avtomattandyrylǵan jańa tehnologııaly sút óńdeý zaýyty táýligine 40 tonna sút ónimin óńdeýge qaýqarly. Qazirgi tańda «Bórte mılka» saýda tańbasymen qaımaq, maı, irimshik, súzbe, ıogýrt ónimderi shyǵarylady.
Aıta keteıik, Túrkistan oblysy ishki saıasat basqarmasy uıymdastyrǵan «Jańarǵan Túrkistan» respýblıkalyq fýtbol týrnırinde Nur-Sultan, Almaty, Shymkent qalalary men Batys Qazaqstan, Jambyl, Qyzylorda, Almaty, Soltústik Qazaqstan jáne Túrkistan oblystarynyń jýrnalısterinen quralǵan komandalar baq synaıdy.
