Fýtboldan Túrkııadaǵy halyqaralyq týrnırde Aqtaýdyń «Kaspıı» komandasy jartylaı fınalda óner kórsetýde
ALMATY. 29 naýryz. QazAqparat - Fýtboldan Túrkııanyń Antalııa qalasynda ótip jatqan «Túrik demalystary» halyqaralyq týrnırinde 2000 jylǵy jasóspirimder arasynda baq synap jatqan qazaqstandyq 3 komanda da óz toptarynda 2-shi oryn aldy.
Atap aıtqanda, «A» tobynda baq synaǵan Aqtaýdyń «Kaspıı» fýtbolshylary Máskeýdiń «FShM» komandasyna 4:0 bop utylǵanymen, Mytışınskıı aýdanynyń balalar men jasósprimder sport mektebiniń aıaqdopshylaryn 2:0 esebimen utty. «S» tobynda oınaǵan Almatynyń «Qaıraty» Máskeýdiń «Rýbleva» komandasynan 2:0 esebimen basym túsip, Máskeý oblysynyń «Master-Satýrn» komandasynan 0:4 bop utyldy. Al «D» tobynda óner kórsetken Almaty qalasyndaǵy №2 daryndy balalalarǵa arnalǵan balalar men jasóspirimder sport mektebiniń oqýshylary Irkýtsk qalasynyń «Jas dınamoshylaryn» 1:0 etip utyp, Máskeýdiń «Torpedosynan» 1:2 bop súrindi.
Shırek fınalda aqtaýlyqtar Krasnodardyń №5 daryndy balalalarǵa arnalǵan balalar men jasóspirimder sport mektebiniń oqýshylarymen oıynnyń negizgi ýaqytynda (1:1) teń oınap, penaltı kezinde 3:1 esebimen basym tústi. Búgin olar endi jartylaı fınalda «Qaıratty 2:3 esebimen utqan Máskeýdiń «Torpodosymen» kezdesedi.
