Fýtboldan Túrkııa sýperlıgasynda Abat Aıymbetov pen Baktıer Zaınýtdınov komandalary ózara kezdesti

ASTANA. KAZINFORM — Qazaqstandyq fýtbolshylar Baktıer Zaınýtdınov pen Abat Aıymbetov oıyn kórsetetin «Beshıktash» jáne «Adana Demırspor» komandalary búgin Túrkııa sýperlıgasy 16-týrynda ózara kezdesti.

Kezdesý barysynda Abat Aıymbetov «Adana Demırspor» sapynda alǵashqy mınýttan jasyl alańǵa shyqty. Ol birinshi kezeńde ózin jaqsy qyrynan tanyta bildi. Nátıjesinde Abat oıynnyń 39-mınýtynda mergendigimen kózge tústi. Bul — qazaqstandyq shabýylshynyń eki oıyn qatarynan soqqan goly. Abat ótken týrda óz komandasynyń «Geztepemen» kezdesýinde de múmkindigin múlt jibergen joq edi.

Sondaı-aq odan basqa «Adana Demırspor» sapynda taǵy bir goldy ıÝsýf Barası 31-mınýtta óz enshisine jazdy.

Ekinshi kezeńde «Beshıktash» Baktıer Zaınýtdınovty 46-mınýtta oıynǵa qosty. Jartylaı qorǵaýshy komandanyń shabýyl shebinde kúsheıtýge kóńil bóldi. Onyń komandalas áriptesi Alı Mýsratı 72-mınýtynda esep aıyrmasyn qysqartty.

Kezdesý barysynda «Adana Demırspor» qarsylasynan 2:1 esebimen basym tústi. Nátıjesinde atalǵan ujym birinshiliktegi alǵashqy jeńisine qol jetkizdi. Qazir olar týrnır kestesinde 5 upaımen on toǵyzynshy orynda tur. Al «Beshıktash» 25 upaımen altynshy orynda keledi.
Aıta ketsek, Baktıer Zaınýtdınov 2023 jyldyń tamyz aıynan beri «Beshıktash», Abat Aıymbetov bıylǵy jyldan «Adana Demırspor» namysyn qorǵap keledi.

Eske salsaq, budan buryn fýtboldan álem chempıonatyndaǵy Qazaqstan quramasynyń irikteý kezeńindegi qarsylastary anyqtaldy