Fýtboldan sýperkýbok oıyny Almatyda ótkiziledi
ASTANA. QazAqparat - Fýtboldan 2019 jylǵy Qazaqstan sýperkýbogy oıyny 3 naýryzda Almaty qalasynda ótkiziledi, dep habarlaıdy QazAqparat tilshisi.
Qazaqstan kásipqoı fýtbol lıgasynyń habarlaýynsha, atalmysh kezdesýdi Astana jáne Almaty qalalarynda ótkizýge usynys túsken edi. Nátıjesinde bul oıyndy mamandar ońtústik astanadaǵy ortalyq stadıonda ótkizýge sheshim qabyldady.
Atalmysh sýperkýbok oıyny el fýtbolynyń tarıhynda 12 márte ótkiziledi. Alǵash ret ol 1995 jyly sarapqa salyndy. Sol joly Semeıdiń «Elimaı» komandasy Almaty qalasynda Óskemenniń «Vostogyn» 2:0 esebimen jeńip, kýbokty enshiledi. Odan keıin arada birshama jyl úzilis oryn alyp, sýperkýbok oıyny 2008 jyly ótkizildi. Ol joly Qostanaıdyń «Tobyly» «Aqtóbeni» 2:0 esebimen tize búktirdi. Kelesi sýperkýbok 2010 jyly boldy. Onda «Aqtóbe» «Atyraýdy» 2:0 esebimen jeńdi.
Sol jyldan beri sýperkýbok oıyndary jylma-jyl turaqty túrde uıymdastyrylyp keledi. Búgingi kúnge deıin oǵan toǵyz komanda shyqty.
«Aqtóbe» úsh márte atalmysh oıynda synǵa tústi. Úsheýinde de jeńimpaz atandy. Kerisinshe «Tobyl» eki márte bul kezdesýge shyqqanymen, qarsylasyna ese jiberip qoıdy.
Aıta keterligi, sońǵy tórt jyldan beri sýperkýbokta «Astana» men «Qaırat» komandalary ózara tartysqa túsip keledi. Onyń ekeýinde astanalyq klýb jeńiske jetse, ekeýinde almatylyq fýtbolshylar basym tústi.
Buǵan deıin sýperkýbok oıyndary 1995, 2017 jyldary ǵana Almaty qalasynda ótkizildi. Qalǵan kezdesý elordadaǵy «Astana-arena» stadıonynda boldy.
Budan buryn fýtboldan Qazaqstan ulttyq quramasynyń bas bapkeri taǵaıyndalǵany habarlaǵan.
