Fýtboldan Premer-lıganyń surmergeni «Qaırat» klýbyna aýysty

ASTANA. KAZINFORM — Fýtboldan Belarýs quramasynyń jartylaı qorǵaýshysy Valerıı Gromyko endi almatylyq «Qaırat» klýbynyń namysyn qorǵaıdy.

Valerıı Gromyko bıyl sáýir aıynan bastap qyzylordalyq «Qaısar» sapynda oıyn kórsetti. Komanda sapynda 11 kezdesýde 5 gol soǵyp, Premer-lıganyń 2024 jylǵy maýsymyndaǵy surmergender tiziminde kósh bastap shyqty.

Belarýs fýtbolshysy sporttyq mansabyn 2015 jyly «Mınsk» fýtbol klýbynda bastady. Odan keıin sol eldegi «Shahter» (Solıgorsk), BATE, Reseıdiń «Arsenal» (Týla), «Torpedo» (Máskeý) klýbtarynda oınaǵan. Óz elinde chempıon, kúmis jáne qola júldegeri bolǵan. Kýbok jáne sýperkýbogynyń ıegeri atandy.

Valerıı Gromyko Belarýs quramasynyń oıynshysy. Ulttyq qurama sapynda 19 oıyn ótkizip, 1 gol soǵyp, 1 nátıjeli pas berdi.

Kelisim-shart 2025 jylǵy maýsymnyń sońyna deıin jasalǵan.

Eske salsaq, búgin fýtboldan Amerıka kýbogynyń ¼ fınaldyq kezeńi bastalady.