Fýtboldan Premer-lıga komandalary arasynda Qazaqstan chempıonatynyń 20-shy týr oıyndary ótti

«Astana Arena» stadıonynda ótken matchta elordalyq «Lokomotıv» Shymkenttiń «Ordabasy» komandasyn qabyldady. Temirjolshylardyń komandasy qarsylastarynan aılasyn asyryp, 1:0 esebi boıynsha jeńiske jeńdi. Degenmen ortalyq match Pavlodarda boldy. Týrnır kestesinde ekinshi orynda turǵan jergilikti «Ertis» úshinshi orynda kele jatqan Aqtóbe komandasyn qabyldap, qajetti úsh upaıdy qanjyǵaǵa saldy. Oıyndaǵy esep 2:1. Aqtóbeniń súringenin Qaraǵandynyń «Shahter» komandasy tıimdi paıdalana bildi. Ol Taraz qalasynda jergilikti komandamen kúsh synasyp, iri eseppen jeńisti oljalady. Osylaısha «Shahter» fýtbolshylary «Aqtóbeni» syrǵytyp, týrnırlik keste boıynsha úshinshi orynǵa kóterildi.

Qalǵan kezdesýlerde kútpegen esepter tirkelgen joq. Favorıtter ózderiniń myqtylyǵyn dáleldeı aldy. Týr barysynda birinshi orynda turǵan Qostanaıdyń Tobyly kósh sońynda kele jatqan Kókshetaýdyń Oqjetpesimen kezdesip, 1:3 esebimen jeńiske jetti. «Jetisý» - «Atyraý» kezdesýinde 1:2 esebi tirkeldi. «Atyraýdyń» bul jeńisi týrnırdiń úzdik alty komandasy qatarynda qalýyna aıtarlyqtaı jaǵdaı jasady.

20-shy týr oıyndarynan keıin Qostanaıdyń Tobyly 41 upaımen kósh bastaýda. Ekinshi orynǵa 40 upaımen Pavlodardyń «Ertisi» jaıǵasqan. Qaraǵandy «Shahteri» 36 upaı jınap úshinshi orynda. «Atyraý» men «Lokomotıv» 5-shi orynǵa talasyp keledi. Olardyń enshisinde 32 upaıdan bar.