Fýtboldan Premer-Lıga klýbtary arasyndaǵy el chempıonatyna qatysýshylardyń quramy bekitildi
ALMATY. Aqpannyń 2-si. QazAqparat /Erlik Erjanuly/ - Búgin Almatyda Qazaqstan Fýtbl federatsııasy Atqarý komıtetiniń májilisi ótti,
dep habarlaıdy QazAqparat.
Kún tártibine engizilgen birinshi másele Premer-Lıga komandalarynyń quramyn maquldaý boldy. Óskemenniń «Vostok» klýby qaryzyn tolyq óteı almaǵandyqtan, Birinshi lıgaǵa aýystyrý týraly Appelıatsııalyq komıtettiń sheshimi búgin kúshine endi. Onyń bosaǵan ornyn endi Atqarý komıtetiniń sheshimi boıynsha Kókshetaýdyń «Oqjetpes» klýby basyp otyr. Bul májiliste el chempıonatynyń birinshi kezeńindegi matchtardyń kúntizbesi men Federatsııanyń Tóreshiler komıtetiniń qyzmetin retteıtin ereje bekitildi.
Ótken maýsymda kóksheteýlyqtar Premer-Lıgada óner kórsetken 14 komandanyń ishinde 11-shi orynǵa taban tiregen bolatyn. Federatsııanyń vıtse-prezıdenti Seıilda Baıshaqovtyń aıtýynsha, klýb basshylyǵy «Oqjetpestiń» jarysqa qatysýy úshin qarjylyq kepildik berip otyr. Qajetti ınfraqurylymy bar olar Premer-Lıgadaǵy ornyn buǵan deıin ótpeli match qorytyndysy boıynsha ǵana bosatqan bolatyn.
