Fýtboldan Ózbekstan quramasy 2026 jylǵy álem chempıonaty fınaldyq kezeńine shyqty

ASTANA. KAZINFORM — Fýtboldan Ózbekstan quramasy 2026 jylǵy álem chempıonaty fınaldyq kezeńine joldama aldy.

Dúbirli dodada Azııa qurlyǵy boıynsha synǵa túsken Ózbekstan quramasy jaqsy oıyn órnegin kórsetti. A tobynda Iran, BAÁ, Qatar, Qyrǵyzstan, Soltústik Koreıamen sheberlik baıqasqan olar 8 oıynda 17 upaı jınaǵan edi. Sondyqtan olar Birikken Arab Ámirligimen kezdesýde teń nátıjege qol jetkizse, álem chempıonatyna tikeleı joldamaǵa qol sozatyn edi.

Bul Ózbekstan quramasyna óz tarıhynda alǵash ret dúnıejúzilik dodaǵa qatysýǵa múmkindik beretin.

Oıyn barysynda olar jınaqy qımyl kórsetýge tyrysty. Nátıjesinde qarsylasymen 0:0 esebimen teń tústi. Óz tobynda 18 upaımen ekinshi orynǵa taban tirep, álem chempıonaty fınaldyq kezeńine tikeleı joldama aldy. 

Endi olar 10 maýsymda óz alańynda Qatardy qabyldaıdy. 

Qazirge deıin AQSh, Kanada, Meksıka, Japonııa, Jańa Zelandııa, Iran, Argentına quramalary 2026 jylǵy álem chempıonatyna qatysatyny belgili boldy. 

Dúbirli dodada alǵash ret 48 qurama baq synaıdy. Onyń 16-y Eýropa, 8-i Azııa, 9-y Afrıka, 6-y Soltústik Amerıka, 6-y Ońtústik Amerıka qurlyǵyna bólinse, 1-i muhıt aımaǵy elderine qaralǵan. Al 2 joldama pleı-off satysy arqyly anyqtalady.

Aıta ketsek, Qazaqstan quramasy 2026 jylǵy álem chempıonatynda J tobynda Ýelske (1:3) jol berip, Lıýksembýrgti (2:0) qapy qaldyrdy. Týrnır kestesinde úsh upaımen úshinshi orynda keledi.
Endi 9 maýsymda ulttyq qurama elordada Soltústik Makedonııa quramasyn qabyldaıdy.

Dál qazir olar syrt alańda Belarýspen joldastyq kezdesý ótkizip jatyr.