Fýtboldan Mysyr quramasy 2018 jylǵy Álem chempıonatyna qatystyrylmaýy múmkin
ASTANA. QazAqparat - FIFA Mysyr Fýtbol federatsııasyn halyqaralyq jarystardan ýaqytsha shettetýi múmkin. Internet-resýrstarda uıym Mysyr Fýtbol federatsııasyna eskertý hat jibergeni jóninde habar taraldy.
footynions.com-nyń Týıtterdegi paraqshasyndaǵy postqa qaraǵanda, FIFA-ǵa el úkimetiniń federatsııa qyzmetine aralasyp jatqany málim bolǵan. Al FIFA erejesine sáıkes, ulttyq federatsııalardyń qyzmetine «úshinshi taraptardyń» aralasýyna tyıym salynady.
Eger Mysyr týrnırlerden shettetiletin bolsa, 28 jyl degende qol jetkizgen joldamasy jaramsyz bolyp, 2018 jylǵy Álem chempıonatyna bara almaýy múmkin. Buǵan deıin Mysyr quramasy tarıhta eki ret: 1934 jyly Italııa Koroldiginde jáne 1990 jyly Italııada ótken mýndıaldarǵa qatysqan. Alaıda FIFA tarapy bul jóninde áli resmı málimdeme jasaǵan joq.
Eske sala keteıik, 10 qazanda FIFA Pákistan Fýtbol federatsııasynyń halyqaralyq jarystarǵa qatysýyna tyıym salǵanyn resmı túrde jarııalaǵan bolatyn.
Buǵan ulttyq federatsııa qyzmetine «úshinshi taraptyń aralasýy» sebep bolǵan. FIFA Pákistan bıliginiń federatsııa keńsesi men esepshottaryn baqylaýda ustaýy erejege qaıshy keletinin málimdegen. Bılik baqylaýy joıylmaıynsha, Pákistan FIFA aıasyndaǵy jarystar men sharalarǵa qatysa almaıdy.
