Fýtboldan Lıga kýbogy: «Atyraý» syrt alańda «Turannan» basym tústi

ASTANA. KAZINFORM — Búgin fýtboldan Lıga kýbogy týrnıriniń ekinshi týrynda S tobynda «Atyraý» syrt alańda «Turannan» basym tústi.

Kezdesý barysynda atyraýlyq klýbtan Edige Oralbaı 38-mınýtta esep ashsa, Naýryzbek Jagorov 96-mınýtta mergendik tanytty.

Osylaısha «Atyraý» qarsylasyn 2:0 esebimen jeńip, týrnır kestesinde birinshi orynǵa kóterildi.

Aıta ketsek, alǵashqy týrda olar óz alańynda Shymkenttiń «Ordabasy» klýbymen 0:0 esebimen teń oınady. 

Bul toptaǵy «Ordabasy» (Shymkent) men «Elimaı» (Semeı) kezdesýi 6 shildede saǵat 20:00–ge josparlanǵan. 

6 shildede V tobynda 18:00–de «Tobyl» (Qostanaı) men «Aqtóbe», 20.00-de «Qaısar» (Qyzylorda) men «Jeńis» (Astana) sheberlik baıqasady.

Sondaı-aq 7 shildede A tobynda 17:00–de «Aqjaıyq» pen «Taraz», «Qyzyljar» (Petropavl) men «Qaırat» (Almaty) kezdesedi.

Dál sol kúni D tobynda 20:00–de «Shahter» (Qaraǵandy) men «Jetisý» (Taldyqorǵan), «Astana» men «Kaspıı» (Aqtaý) synǵa túsedi.

Bıyl alǵash ret jalaýyn kótergen týrnırde 16 komanda 4 topta synǵa túsip, árqaısysy 3 oıynnan ótkizedi.