Fýtboldan QR premer-lıgasynyń 7-shi týry: «Aqtóbe» «Qaırattan» ońbaı utyldy
ASTANA. QazAqparat - Fýtboldan Qazaqstan premer-lıgasynyń 7-shi týrynda pavlodarlyq «Ertis» «Astanamen» teń oınasa, Almatynyń «Qaıraty» qaharyna minip, «Aqtóbeniń» tas-talqanyn shyǵardy. Al Kókshetaýdyń «Oqjetpesi» kezekti jeńisine qol jetkizdi, dep habarlady Sports.kz.
Sonymen:
«Tobyl» - «Jetisý» 2:2 (2:0)
Gol: Djalılov 1 (1:0), Djalılov 13 (2:0), Savıch 54 (2:1), Turysbek 56 (2:2)
Qostanaıdyń «Tobyly» upaı sanyn jankúıeriniń kóńilin kúpti etetindeı qarqynmen joǵaltý ústinde. Bul komanda Taldyqorǵannyń «Jetisýymen» ótken kezdesýdiń alǵashqy taımynda-aq Raýl Djalılovtiń nebári 15 mınýtqa jetpeıtin ýaqyttyń ishinde soqqan golynyń arqasynda aıdarynan jel esip turǵan edi. Alaıda, oıynnyń ekinshi bóliginde taldyqorǵandyqtar qaharyna minip, qarsylastarynyń qaqpasyna qarymta 2 dop soǵyp ketti. Kezdesýdiń 54-shi mınýtynda «Jetisý» kóshbasshysy Dýshan Savıch qostanaılyqtardyń osal tusyn dál ańǵarsa, 2 mınýt ótpeı Baýyrjan Turysbek komandalasynyń erligin qaıtalaı aldy.
«Oqjetpes» - «Ordabasy» 2:0 (2:0)
Gol: Chıjov 2 (1:0), Moldaqaraev 3 (2:0)
Bul týrdy kókshetaýlyq «Oqjetpes» sátti bastady desek te bolady. Óıtkeni, Shymkenttiń «Ordabasy» komandasymen joly túıisken kókshetaýlyqtar oıynnyń alǵashqy 3 mınýtynda qarsylastarynyń qaqpasyna teńbil topty terbetti. Alǵashqy dopty Sergeı Boıchenko soqsa, odan keıin Jasulan Moldaqaraev qarsylastarynyń qaqpasynyń osal tusyn dál tapty. Shymkenttikter ázirshe jankúılerlerin qýanta alar emes. Birde jeńistiń býyna masattansa, birde jeńilistiń aşy dámin tatyp, ala-qula óner kórsetýde.
«Taraz» - «Atyraý» 0:0
Ekeýine de jeńis asa qajet kelesi komandalar juby Tarazda toqaılasty. «Atyraý» komandasyn óz alańynda qabyldaǵan «Taraz» jergilikti jankúıerlerdiń qarasy qalyń bolsa da adym asha almady.
«Qaırat» - «Aqtóbe» 3:0 (2:0)
Gol: Markovıch 42 (1:0), Arshavın 43 (2:0), Tımoşýk 90 (3:0)
Bul joly Almatynyń «Qaıraty» aıqyn jeńiske jetti. Oıynnyń alǵashqy kezeńinde almatylyq Jerar Goý men Andreı Arshavın qarsylastarynyń qaqpasyna gol soqsa, ekinshi taımnyń sońynda Anatolıı Tımoşýk aqtóbelikterdiń osal tusynan dóp tústi.
«Ertis» - «Astana» 2:2 (1:2)
Gol: Ahmetov 3 (1:0), Despotovıch 6 (1:1), Mýjıkov 28 (1:2), Fonseka 58 (2:2)
Astana men Pavlodar oıyny da barynsha tartysty ótip, komandalar ıtjyǵys tústi desek te bolady. Árıne, jeńis bolmasa da mundaı tepe-teńdik elordalyq komanda úshin ońtaıly. Óıtkeni, elordalyq klýb reıtıng kestesinde kóshbasshylyq ornyn saqtap qalyp otyr.
«Aqjaıyq» - «Shahter» 0:1 (0:1)
Gol: Fınonchenko 17 (0:1)
Áýpirimdep júrip, qaraǵandylyq «Shahter» óz upaıyna qol jetkizdi. Bul joly Oralǵa barǵan kenshiler jergilikti «Aqjaıyq» komandasynyń qaqpasyna oıynnyń 17-shi mınýtynda gol soǵyp, jeńiske jetti.
