Fýtboldan QR kýbogy: Іrikteý kezeńiniń jeńimpazdary anyqtaldy
ASTANA. QazAqparat - Fýtboldan Qazaqstan kýbogynyń irikteý týrnırinen irkilmeı ótip, 1/8-fınalǵa joldama alǵan tórt komanda anyqtaldy, olar: «Maqtaaral», «Qyran», «Jetisý» jáne «Qyzyl-Jar».
Endi búgingi jerebe tartý rásiminen keıin bul komandalardyń Premer-lıgadaǵy qarsylastary belgili bolady. Naýryzdyń 28-i men sáýirdiń 6-sy aralyǵynda Shymkentte Qazaqstan kýbogynyń irikteý dodasy ótti.
Esterińizge sala keteıik, El kýbogynyń erejesi boıynsha irikteý kezeńine Birinshi lıganyń jeti komandasy jáne Ekinshi lıganyń eki komandasy qatysyp, olar ózara úsh topqa bólingen. Ár toptyń jeńimpazy jáne ekinshi oryn ıemdengenderdiń ishinde kórsetkishi joǵary bir komanda 1/8-fınalǵa joldama alýǵa múmkindik alǵan.
Taǵy bir aıta keterligi, Premer-lıgadaǵy klýbtardyń farm-komandalary degen jeleýmen Birinshi lıganyń úsh komandasy «Shahter-Bolat», «Baıqońyr» jáne «Qaırat-A» komandalaryna Kásipqoı fýtbol lıgasy El kýbogyna qatysýǵa shekteý qoıdy. Al týrnır bastalǵan kúnniń ertesinde Shymkentke shyǵystyń «Altaıynyń» da barmaǵany belgili boldy. Semeıdiń komandasy Qazaqstan kýbogyna qatysýdan bas tartqan. Sóıtip, ekinshi topta eki-aq komanda «Qyran» men «Ekibastuz» ǵana qaldy.
Birinshi topta «Maqtaaral» birinshi oryn aldy. Aldymen Shymkenttiń №7 BJSMOR komandasynan 0:2 esebimen utylyp jatyp, 4:2 nátıjesimen jeńisti julyp alǵan jetisaılyqtar kelesi kezdesýde «Qyzyl-Jarmen» bir-bir goldan almasyp, teń tústi. Óz kezeginde Vladımır Fomıchev bastaǵan petropavldyqtar da sport mektebiniń komandasyn 2:1 esebimen utyp, eki oıynda enshilerine 4 upaı jazǵan. Sondyqtan, ekinshi oryn alǵandardyń ishinde nátıjesi eń joǵary bolǵany úshin 1/8-fınaldyń joldamasyn jeńip aldy.
Ekinshi topta bir-aq kezdesý ótti. «Altaı» Qazaqstan kýbogyna qatyspaǵannan keıin bul toptyń joldamasyn «Qyran» men «Ekibastuz» ekeýara sheshti. Ol kezde «Altaıdyń» áli ahýaly belgili bolmaǵan kez. Sondyqtan shyǵar, «Ekibastuz» 0:2 esebimen utylyp qaldy. «Qyran» bir ǵana kezdesý ótkizip, kelesi kezeńniń joldamasyna qol jetkizdi.
Úshinshi topta «Jetisýǵa» teń keler eshkim bolmady. Ras, oıyndary ońaıǵa soqqan joq. Shabýyl shebiniń aqsap turǵanyn ańǵardyq. Eki matchta da jyldam gol soqqanymen «Kaspııdiń» qaqpasyna bir ǵana gol toǵyta aldy. Keshe «Rýzaevkamen» oınady. Toǵyzynshy mınýtta-aq esep ashqanymen birinshi taımnyń sońyna taman soltústik qazaqstandyqtar tarazy basyn teńestirip ketti. Tek kezdesýdiń sońyna taman ǵana Vıacheslav Serdıýkov «Jetisýǵa» jeńisti julyp áperdi.
Derekkóz: Astana fýtbol federatsııasy
