Fýtboldan QR chempıonaty: «Tobyl» men «Ertis» teń tústi
QOSTANAI. QazAqparat - QR chempıonatynyń 19-týrynda Qostanaıdyń «Tobyly» Pavlodardyń «Ertisin» qabyldady, dep habarlaıdy QazAqparat tilshisi.
Kezdesýdiń alǵashqy on mınýtynda anaý aıtarlyqtaı ózgeris bolǵan joq. Vladımır Nıkıtenko búgingi oıynǵa jańadan kelgen Ionýts Larıe men Hýan Leskanony birinshi mınýttan shyǵardy.
Oıyndaǵy birinshi dál soqqy Samat Jarynbetovtiń oryndaýynda boldy. Alaıda, «Ertis» qaqpashysy N.Kalmykov kerek jerden tabyldy.
Birinshi taım sońyna qaraı Aslan Darabaev orta tustan dopty tartyp áketip, Baýyrjan Turysbekke pas usyndy. Sońǵysynyń doby «Ertis» qorǵaýshylarynan serpilip, buryshqa shyǵyp ketti. Buryshtama doby kezinde jaraqat alyp qalǵan Ionýts Larıe dárigerlerdiń kómegine júgindi.
Ekinshi taım basynda qostanaılyqtar esep ashatyn sátti múlt jiberdi. Djaba Kankavanyń bergen pasyn Aslan Darabaev golǵa aınaldyra almady.
Qarymta shabýyldardyń birinde alań ıeleri gol soqty. Avtory - Samat Jarynbetov. Oǵan Aslan Darabaev múmkindik jasady.
«Ertis» kóp uzatpaı esepti teńestirip ketti. Buryshtama dobynan soń Dorý Popadıýk soqqy jasady. Onyń tepken doby Arman Smaılovqa tıip qaqpaǵa endi. Esep - 1:1.
Tóreshi qosqan mınýttarda eshqandaı ózgeris bolmady. Osylaısha, qostanaılyqtar búgingi oıynnan bir upaı enshiledi.
Aıta keteıik, keshe 21 shilde kúni Qazaqstan birinshiliginiń 19-týr oıyndary aıasynda úsh match ótti. Taldyqorǵannyń «Jetisýy» óz alańynda «Aqtóbege» 1:2 esebimen jol berse, Qaraǵandydaǵy oıynda jergilikti «Shahter» Qyzylordanyń «Qaısarymen» 2:2 esebimen teń tústi. Sondaı-aq Atyraýda jergilikti «Atyraý» men Oraldyń «Aqjaıyǵy» kezdesip, oıyn 2:0 esebimen atyraýlyqtardyń paıdasyna aıaqtaldy.
Osy ýaqytta «Ordabasy» men «Qaırat» komandalarynyń matchy ótip jatyr.
