Fýtboldan QR chempıonaty márege jetip, júldegerler belgili boldy
ASTANA. QazAqparat - Búgin fýtboldan premer-lıga komandalary arasynda Qazaqstan chempıonaty márege jetti.
El chempıony («Astana») men kúmis júldeger (Almatynyń «Qaıraty») osyǵan deıin belgili bolsa, sońǵy týrda tek qola medal ıelerin anyqtaýǵa týra keldi. Úshinshi orynnan birneshe komanda úmitker bolatyn. Sonyń ishinde óz alańynda el chempıonyn qabyldaǵan Pavlodardyń «Ertisine» teń oınasa jetkilikti edi. Al 3 qarasha kúni Eýropa Lıgasynda Grekııanyń «Olımpıakos» komandasymen oınaıtyn astanalyqtar kúni buryn óz maqsatyn oryndaǵandyqtan, bul matchqa qosalqy quramda otyrǵan biraz fýtbolshylaryn shyǵardy. Sóıtip 0:0 esebimen teń aıaqtalǵan kezdesýden keıin «Ertis» 49 upaı jınap, qola júldemen birge kelesi jyly Eýropa Lıgasynyń irikteý saıysynda oınaýǵa joldama aldy. «Ordabasy» Shymkentte «Aqtóbeni» 2:1 esebimen utqanymen, 48 upaımen tórtinshi orynǵa ǵana taban tireı aldy.
Bul týrdaǵy asa mańyzdy kezdesýdiń biri Taldyqorǵanda «Jetisý» men «Aqjaıyq» komandalary arasynda ótti. Premer-lıgadaǵa ornyn saqtap qalý úshin qos klýbqa da jeńis aýadaı qajet edi. Bul matchta oraldyqtar shıraq ta jınaqy oınaı bildi. Birinshi taımda jaraqat alyp qalǵan serbııalyq shabýylshy Mıroslav Lechıchtiń ornyna shyqqan Oral fýtbolynyń túlegi Rýslan Valıýllın kóp uzamaı, 33-mınýtta sol qaptaldan dál pas berdi. Ony taǵy bir serbııalyq Predrag Govedarıtsa baspen Eldar Sergıenkoǵa baǵyttady. Kezinde Qazaqstan quramasynda oınaǵan E.Sergıenko urymtal tusta múlt ketken joq. Ekinshi taımda taldyqorǵandyqtar qarymta qaıtarýdyń ornyna armenııalyq legıoner Narık Beglarıan alańnan qýylǵannan keıin óz qaqpalaryna taǵy bir dop jiberip aldy. Bul joly Batys Qazaqstan fýtbolynyń taǵy bir túlegi Edýard Abdrahmanovtyń pasyn paragvaılyq Freddı Koronel Ortız sátti paıdalanyp, esepti 2:0-ge jetkizdi. Sonymen, «Jetisý» on jyldan keıin qaıtadan birinshi lıgaǵa syrǵysa, «Aqjaıyq» 35 upaımen onynshy orynǵa ornyǵyp, premer-lıgadaǵy ornyn saqtap qaldy. 35 upaı jınasa da, qosymsha kórsetkishter boıynsha 11-oryndy ıelengen «Tarazǵa» da premer-lıgada qalýǵa múmkindik bar. Ol úshin birinshi lıgada ekinshi oryndy ıelengen Semeıdiń «Altaıymen» 5 qarasha kúni «Astana Arenada» ótetin oıynda jeńimpaz atansa, jetip jatyr.
Aıta keteıik, «Qaırattyń» namysyn qorǵap júrgen ıvýarııalyq shabýylshy Jerar Goý 22 golmen chempıonattyń mergen oıynshysy atandy. «Ertistiń» jartylaı qorǵaýshysy Roman Mýrtazaev mergender kóshinde 18 doppen ekinshi, almatylyqtardyń kapıtany Baýyrjan Islamhan 17 golmen úshinshi oryndy ıelendi.
