Fýtboldan QR chempıonaty: «Aqjaıyq» ekinshi jeńisine qol jetkizdi
ORAL. QazAqparat - Fýtboldan premer-lıga komandalary arasynda Qazaqstan chempıonatynyń kezekti týrynda Oraldyń «Aqjaıyǵy» óz alańynda Qyzylordanyń «Qaısaryn» qabyldap, 1:0 esebimen jeńiske jetti, dep habarlaıdy «QazAqparat» tilshisi.
Bıylǵy maýsymda bolgarııalyq maman Stoıcho Mladenov jattyqtyratyn «Qaısar» birinshilikti tamasha bastap, qatarynan úsh márte jeńiske jetip, birinshi orynǵa kóterilgen edi. Alaıda odan keıin qarqyny báseńdep, altynshy orynǵa túsip qaldy. Al qazaqstandyq maman Vahıd Masýdov baptaıtyn oraldyqtar osynyń aldynda qatarynan tórt ret teń oınap, jetinshi satyǵa ornyqqan edi. Sondyqtan týrnır kestesindegi kórshiler úshin úsh upaı aýadaı qajet-tuǵyn.
Alań ıelerin Tarazdaǵy match sońynda jaraqat alyp qalǵan komanda kapıtany Meıram Sapanovtyń ornyna nıgerııalyq ortalyq qorǵaýshy Maıkl Odıbe bastap shyqty. Shyndyǵynda da M.Odıbe sol úmitti aqtap, qorǵanys shebinde barynsha saýatty oınap, shabýylǵa da qosylyp, komandalastaryna dem berýmen boldy. Birinshi taımda «Aqjaıyqtan» Azat Ersalımov «Qaısardyń» qaqpashysy Marsel Islamqulovpen jekedara shyǵyp, gol soǵa almaı, qapy qaldy. Odan keıin taǵy bir nıgerııalyq Izý Azýkanyń qaýipti soqqysyn M.Islamqulov qaıtara bildi. Degenmen «Aqjaıyq» ekinshi taımda maqsatyna jetti. 56-mınýtta standartty jaǵdaıdan keıin qaqpa aldyndaǵy qarbalas sátte Oral fýtbolynyń túlegi Rýslan Valıýllın ábjildik tanytty. Budan keıin «Qaısar» qansha umtylǵanymen, tarazy basyn teńestire almady. Alań ıeleri de qorǵanysta jatyp almaı, qarsy shabýyl uıymdastyrýǵa tyrysyp baqty.
Sóıtip tórt teń oıynnan keıin ekinshi jeńisine qol jetkizgen V.Masýdovtyń shákirtteri 10 upaı jınap, jetinshi orynǵa nyqtala tústi. «Aqjaıyq» kelesi oıyndaryn top basyndaǵy komandalarmen ótkizedi. Aldymen 29 sáýir kúni Almatyda «Qaıratpen» kúsh synassa, odan keıin óz alańynda 2 mamyrda Qostanaıdyń «Tobylyn» qabyldaıdy.
Aıta keteıik, osy týrda «Astana» óz alańynda «Tarazdy» 4:0 esebimen oısyrata utyp, 19 upaı jınap, týrnır kestesindegi jaǵdaıyn jaqsarta tústi. Bul kezdesýde Jýnıor Kabananga qos doptyń avtory atansa, Srdjan Grahovats pen Dıdar Jalmuqan bir-birden gol soqty. Pavlodarda ótken ortalyq kezdesýde «Ertis» pen «Qaırat» 3:3 esebimen teń oınady. Aldymen Jerar Goý esep ashqanymen, odan keıin Stefan Jıvkovıch, Aslan Darabaev, Dja Djedje mergendik tanytyp, «Ertis» 3:1 esebimen alǵa shyqty. Degenmen «Qaırat» qaıratyn kórsetip, Ivo Ilıchevıch esepti qysqartsa, oıyn sońynda komanda kapıtany Baýyrjan Islamhan tarazy basyn teńestirip ketti. Birinshi týrda óz alańynda «Astananyń» ózin tize búktirgen «Ordabasy» bul joly Qostanaıdyń «Tobylynan» sheberligin asyra almady. Aldymen shymkenttikterden Kırıll Kovalchýk birinshi taım sońynda esep ashqanymen, oıynnyń ekinshi kezeńinde qonaqtardan Toqtar Jańǵylyshbaı men Djordje Despotovıch «Tobylǵa» jeńis áperdi. Osylaısha 16 upaıdan jınaǵan «Ertis» pen «Tobyl» ekinshi-úshinshi orynda quıryq tistesip keledi. Al «Qaırattyń» olardan bir ǵana upaıy kem. 29 sáýir kúni ótetin toǵyzynshy týrda ortalyq kezdesý Qostanaıda «Tobyl» men «Ertistiń» arasynda bolmaq.
Bul týrda alańdardyń talapqa sáıkes bolmaýyna baılanysty taǵy eki kezdesý keıinge qaldyryldy. «Aqtóbe» Qaraǵandynyń «Shahterin» 28 maýsymda, «Atyraý» Kókshetaýdyń «Oqjetpesin» 26 shilde kúni qabyldaıdy.
