Fýtboldan QR birinshiligi: Eki qaladaǵy matchtardyń nátıjesi anyqtaldy
ASTANA. QazAqparat - Búgin, 21 shilde kúni elimizdiń úsh qalasynda fýtboldan el birinshiliginiń 19-týr oıyndary ótýde. Qazirge deıin atalmysh týr aıasyndaǵy eki kezdesý máresine jetti, dep habarlaıdy QazAqparat tilshisi.
Bul týrdaǵy alǵashqy oıyn Taldyqorǵan qalasynda ótkizildi. Jergilikti «Jetisý» klýby «Aqtóbe» komandasyn qabyldady. Atalmysh kezdesýde qonaqtar 31-mınýtta gol soǵyp ketti. Alań ıeleri óz aıyp alańynda óreskel qatelikke jol berdi. Ony «Aqtóbe» oıynshysy Baǵdat Qaıyrov utymdy paıdalana bildi. Budan keıin «Jetisý» jigitteri birden shabýyl shebin kúsheıte tústi. Olar 43-mınýtta tarazy basyn teńestirýge múmkindik alǵan edi. Degenmen bul múmkindikti «Jetisý» shabýylshysy Mılan Boıovıch óz paıdasyna jaza alǵan joq. Ekinshi kezeńde taldyqorǵandyq fýtbolshylar gol soǵý múmkindigin qarastyrdy. Degenderine 66-mınýtta jetti. Alań ıeleri qatarynan Raýl Djalılov tarazy basyn teńestirdi. Dese de kezdesý taǵdyry 86-mınýtta soǵylǵan golmen sheshildi. Ony «Jetisý» shabýylshysy óz qaqpasyna soǵyp aldy. Osylaısha «Aqtóbe» segizinshi jeńisin toılasa, «Jetisý» toǵyzynshy jeńilisine ushyrady.
Atalmysh týrdaǵy ekinshi kezdesý Qaraǵandyda jergilikti «Shahter» men Qyzylordanyń «Qaısary» arasynda órbidi. Atalmysh kezdesýde jankúıerler 4 gol kórdi. Aldymen «Qaısar» oıynshylarynyń qanjyǵasy maılandy. Oıynnyń 4-mınýtynda Bratıslav Pýnoshevats alań ıeleri qateligin sheber paıdalanyp, óz komandasyn alǵa shyǵardy. Odan keıingi gol 57-mınýtta soǵyldy. «Qaısardyń» jartylaı qorǵaýshysy Vladımır Arjanov penaltıden gol soǵyp, esepti ústemeleı tústi. Bul gol alań ıeleriniń namysyn oıatqan sekildi. 64-mınýtta Sergeı Tkachýk gol soǵyp, esep aıyrmasyn qysqartty. Al nebári tórt mınýt ótkende «Shahter» tarazy basyn teńestirdi. Gol avtory - Marat Shahmetov.
Bul týrdaǵy «Qyzyljar» men «Astana» arasyndaǵy oıyn bıylǵy 25 sáýirde ótip, syrt alańda elordalyqtar 2:0 esebimen jeńiske jetken bolatyn.
Aıta keteıik, osy ýaqytta «Atyraý» men «Aqjaıyq» komandalary arasynda kezdesý ótip jatyr. Ol Astana ýaqytymen 20.30-da bastaldy.
Al «Jetisý» búgin óz alańynda «Aqtóbege» 1:2 esebimen jol berdi. Al 22 shildede «Tobyl» men «Ertis», «Ordabasy» men «Qaırat» komandalary kezdesedi.
Kelei týr oıyndary 28 jáne 29 shilde kúnderi bolady. 28 shildede «Qaısar» men «Qyzyljar», «Astana» men «Atyraý», «Aqjaıyq» pen «Atyraý» komandalary kezdesse, 29 shildede «Ordabasy» men «Jetisý», «Qaırat» pen «Tobyl», «Ertis» pen «Shahter» komandalary ózara sheberlik baıqasady.
