Fýtboldan QR birinshiligi: «Atyraý» «Aqjaıyqtan» aılasyn asyrdy
ATYRAÝ. QazAqparat - Atyraýda fýtboldan el birinshiligi aıasyndaǵy 19-týr oıyndarynyń úshinshi matchy aıaqtaldy. Alańda jergilikti «Atyraý» men Oraldyń «Aqjaıyǵy» kezdesti, dep habarlaıdy QazAqparat tilshisi.
«Atyraý» komandasy ústimizdegi jyly óte sátsiz oıyn kórsetip keledi. Búgingi kúi týrnır kestesinde sońǵy orynda tur. «Aqjaıyqqa» deıin nebári 2 kezdesýde jeńiske jetken edi. Sońǵy ret óz alańynda 28 sáýirde «Jetisý» komandasyn 1:0 esebimen tize búktirdi. Sodan beri óz alańynda úsh ret teń túsip, tórtinshisinde jeńiliske ushyrady. Al 31 mamyrda syrt alańda Shymkenttiń «Ordabasy» klýbyn 2:0 esebimen jeńdi. Dese de odan keıin jeńiske jete almaı júrgen edi.
Esesine, «Aqjaıyqtyń» jaǵdaıy jaman emes. Olar týrnır kestesinde 23 upaımen ortan belinde turǵany belgili. «Aqjaıyq» jigitteri syrt alańda sátsiz oıyn kórsetedi. Búginge deıin olar 10 kezdesýde alty ret utyldy, úsheýinde teń túsip, bireýinde jeńiske jetti. Al 7 shildede «Aqjaıyq» Qaraǵandyda «Shahterden» 2:1 esebimen basym tústi. Budan burynǵy týrda «Atyraý» syrt alańda «Aqtóbeden» 1:5 esebimen jeńilip, óz jankúıerleriniń seniminen shyǵa almady. Al «Aqjaıyq» óz alańynda «Qyzyljardan» 2:0 esebimen aılasyn asyrdy.
«Atyraý» bıyl úsh márte bas bapker aýystyrdy. Birinshilikti aldymen otandyq maman Vahıd Masýdov bastady. Komandadaǵy sátsizdikten keıin onyń ornyna moldovalyq Andrıan Sosnovskıı keldi. Ol da «Atyraýdyń» basyndaǵy jaǵdaıdy túzeı almady. Jaqynda ǵana komandaǵa elimizge belgili maman Vıktor Kýmykov bas bapker bolyp taǵaıyndaldy. V. Kýmykov jetekshilik etken alǵashqy oıyndarda da «Atyraý» ońala alǵan joq. Degenmen, «Atyraý» aldaǵy ýaqytta ózgelermen terezesi teń oıyn kórsetýge múmkindigi mol. Oǵan búgingi kezdesý dálel bola alady.
Alǵashqy gol 24-mınýtta soǵyldy. Ony «Atyraý» sapynan Igor Zenkovıch sátti oryndaı bildi. Budan keıin eki komanda arasyndaǵy kezdesý qyza tústi. Dese de alań ıeleriniń basymdyǵy aıqyn ańǵarylyp turdy. Al 56-mınýtta «Atyraý» esepti ústemeleı tústi. Bul gol Predrag Sıkımıchtiń enshisine jazyldy. Esep - 2:0. Osylaısha «Atyraý» el birinshiliginde 11 týrdan keıin jeńiske qol jetkizdi.
Búgin elimizdiń eki qalasynda el birinshiligi aıasyndaǵy 19-týr oıyndarynyń matchtary ótkenin buǵan deıin habarlaǵan bolatynbyz.
Taldyqorǵannyń «Jetisýy» óz alańynda «Aqtóbege» 1:2 esebimen jol berse, Qaraǵandydaǵy oıynda jergilikti «Shahter» Qyzylordanyń «Qaısarymen» 2:2 esebimen teń tústi. Aıta keteıik, osy týrda 22 shildede «Tobyl» men «Ertis», «Ordabasy» men «Qaırat» komandalary kezdesedi.
20-týr oıyndary 28 jáne 29 shilde kúnderi bolady. 28 shildede «Qaısar» men «Qyzyljar», «Astana» men «Atyraý», «Aqjaıyq» pen «Atyraý» komandalary kezdesse, 29 shildede «Ordabasy» men «Jetisý», «Qaırat» pen «Tobyl», «Ertis» pen «Shahter» komandalary ózara sheberlik baıqasady.
