Fýtboldan QPL: «Kaspıı» «Qaısardy» jeńdi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan chempıonatynyń altynshy týry aıasynda eki oıyn ótti, dep habarlaıdy QazAqparat tilshisi.
Alǵashqy match Jambyl oblysynyń «Taraz» jáne Kókshetaýdyń «Oqjetpesi» arasynda boldy. Eki komanda da dop dodasynda sátsiz oıyn kórsetip keledi. Búginge deıin «Taraz» nebári 5 upaı jınasa, «Oqjetpes» bes kezdesýdiń barlyǵynda qarsylasyna ese jiberip qoıdy.
Alǵashqy kezeńde kókshetaýlyq klýbtyń belsendiligi aıqyn ańǵarylyp turdy. Degenmen, tarazdyq shabýylshy Baýyrjan Turysbek 26-mınýtta esep ashty.
Ekinshi kezeńde «Oqjetpes» sapynan Sanat Jumahanov - 47, Martıns Jıan dos Santos 74-mınýtta qos gol soǵyp ketti. Al 88-mınýtta Baýyrjan Turysbek qaıtadan tarazy basyn teńestirdi. «Oqjetpes» kezdesý taǵdyryn sheshken dopty 89-mınýtta saldy. Osylaısha, kókshelik klýb 3:2 esebimen jeńiske jetti. Nátıjesinde olar bıylǵy chempıonattaǵy alǵashqy jeńisine qol jetkizdi.
Bıyl Premer-lıgaǵa uzaq jylǵy úzilisten keıin qaıta oralǵan Aqtaýdyń «Kaspıı» klýby da bes týr boıy birde-bir upaıǵa qol jetkize alǵan joq. Esesine búgingi qarsylasy - Qyzylordanyń «Qaısary» birde-bir márte jeńilistiń aşy dámin tatqan joq bolatyn. Búgingi kezdesýde «Kaspıı» 1:0 esebimen jeńiske jetti. Jalǵyz goldy aqtaýlyq fýtbolshy Stefan Býkorats óziniń enshisine jazdy.
Endi, altynshy týr aıasynda 27 tamyz kúni «Jetisý» men «Qyzyljar» komandalary kezdesedi. Osy týrdaǵy «Qaırat» pen «Astana», «Ordabasy» men «Tobyl» komandalary arasyndaǵy kezdesýler belgisiz merzimge keıinge shegerildi.
