Fýtboldan Konferentsııa lıgasynda «Tobyl» qarymta oıyn ótkizedi
NUR-SULTAN. QazAqparat - Fýtboldan UEFA Konferentsııa lıgasy ekinshi irikteý satysyndaǵy Qostanaıdyń «Tobyly» syrt alańda Gıbraltardyń «Lınkoln Red Imps» komandasymen qarymta oıyn ótkizedi, dep habarlaıdy QazAqparat tilshisi.
Kezdesý búgin elorda ýaqytymen 22:00-de bastalyp, «Qazsport» telearnasynan tikeleı efırde kórsetiledi.
Atalǵan oıynda ızraıldik Gal Laıbývıtts bas tóreshi qyzmetin atqarady. Oǵan otandastary Iossı Babaıof pen Omer Barbıro kómekshi bolady. Qosalqy tórshi de sol eldiń ókili - Shalom Ben Avram.
Eske salsaq, Qostanaıda ótken alǵashqy oıynnyń 65-mınýtynda «Tobyl» oıynshysy Aıbar Jaqsylyqov gol soqsa, odan keıin Serj Deble 89-mınýtta esepti ústemeleı tústi.Osylaısha qostanaılyq klýb qarsylasynan 2:0 esebimen basym tústi.
Aıta ketsek, atalǵan juptyń jeńimpazy úshinshi irikteý satysynda «Tırana» (Albanııa) jáne «Zrınskı» (Bosnııa ı Gertsegovına) jubynyń jeńimpazymen kezdesedi.
Sondaı-aq, ekinshi irikteý satysynda qazaqstandyq «Astana» Polshanyń «Rakýv» komandasynan 0:5, «Qaırat» Vengrııanyń «Kashverdasynan» 0:1, «Qyzyljar» Horvatııanyń «Osıeginen» 1:2 esebimen jeńilip qaldy. Atalǵan komandalar qarymta kezdesýdi 28 shilde kúni ótkizedi.
