Fýtboldan klýbtar arasyndaǵy ÁCh: «Al-Ittıhad» «Oklend Sıtıdi» jeńdi

Búgin fýtboldan klýbtar arasyndaǵy 2023 jylǵy álem chempıonaty bastaldy, dep habarlaıdy Kazinform.

Bıyl álem chempıonatynda «Flýmınense» (Brazılııa), «Manchester Sıtı» (Anglııa), «Leon» (Meksıka),«Ýrava Red Daımonds» (Japonııa), «Al-Ahlı» (Egıpet), «Oklend Sıtı» (Jańa Zelandııa) jáne «Al-Ittıhad» (Saýd Arabııasy) synǵa túsedi.

Atalǵan týrnırdiń alǵashqy oıynynda «Al-Ittıhad» jáne «Oklend Sıtı» komandalary kezdesti.

Bıyl Saýd Arabııasy klýbyna Karım Benzema, N'Golo Kante sekildi belgili fýtbolshylar qosyldy. Eýropa qurlyǵynda belgili komandalar sapynda oınaǵan olar jańa ujymnyń joǵary jetistikke jetýine barynsha kúsh salyp keledi.

Tájirıbeli fýtbolshylar búgingi oıynda da mergendik tanytyp, óz áriptesterin jeńiske jeteleı tústi. Oıynnyń 29-mınýtynda «Al-Ittıhad» sapynan Romarıno kózdegen nysanadan múlt ketken joq.

Al atalǵan klýbtan N'Golo Kante 34, Karım Benzema 40-mınýtta basymdyqty arttyra tústi.
Osylaısha saýdııalyq klýb qarsylasynan 3:0 esebimen basym tústi.

Endi «Al-Ittıhad» 15 jeltoqsanda «Al-Ahlı» komandasymen kezdesse, sol kúni «Leon» men «Ýrava Red Daımonds» sheberlik baıqasady.

Al 18 jeltoqsanda jartylaı fınalda «Flýmınense» «Al-Ahlı» men birinshi týrdyń jeńimpazymen bolǵan kezdesýdiń jeńimpazymen jasyl alańǵa shyǵady.

Taǵy bir jartylaı fınalda 19 jeltoqsanda «Manchester Sıtı» «Leon» men «Ýrava Red Daımonds» jubynyń jeńimpazymen kezdesedi.

Fınal men 3-oryn úshin oıyndar 22 jeltoqsanǵa belgilengen.