Fýtboldan Qazaqstannyń jastar quramasy Eýropa chempıonatynyń irikteý týrnıri aıasyndaǵy jarysyn aıaqtady
ASTANA. Qazannyń 17-si. QazAqparat /Ernur Aqanbaı/ - Fýtboldan 21 jasqa deıingi Qazaqstannyń jastar quramasy 2011 jylǵy Eýropa chempıonatynyń irikteý týrnıri aıasyndaǵy sońǵy oıynyn syrt alańda Shvetsııa quramasymen oınap, 5:1 esebimen utylyp qaldy,
dep habarlaıdy QazAqparat.
Osylaısha segiz oıynnyń ekeýinde teń túsip, bireýinde jeńiske jetip, beseýinde jeńilip qalǵan jerlesterimiz 5 upaımen ázirge óz tobynda tórtinshi orynda keledi jáne tıisinshe olar pleı-off kezeńine shyǵa almady. Aıta keteıik, Qazaqstannyń jastar quramasy Eýropa chempıonatynyń irikteý týrnıri aıasynda Izraıl, Shvetsııa, Bolgarııa jáne Chernogorııa quramalarymen birge 6-shy topta óner kórsetti. Bul toptaǵy jarys keler jyly qyrkúıektiń 7-de aıaqtalady.
Іrikteý týrnırine barlyǵy 52 komanda qatysýda. Danııa chempıonatty uıymdastyratyn el bolǵandyqtan, birden fınalǵa jiberildi. Qalǵan komandalar on topqa bólindi. 2009 jylǵy naýryzdyń 28-de bastalǵan, 2010 jylǵy qyrkúıektiń 7-de aıaqtalatyn irikteý týrnırinde toptardyń árqaısynda eki aınalymnan turatyn oıyndar ótedi. Іrikteý týrnıriniń qorytyndysy boıynsha ár toptyń jeńimpazy jáne nátıjeleri úzdik ekinshi oryn alǵan tórt komanda pleı-offqa ótip, jeti jupty qurady. Bul kezeńde sátti oınaǵan jeti juptyń jeńimpazdary Danııadaǵy fınaldyq týrnırge joldama alady.
