Fýtboldan Qazaqstan jastary Armenııaǵa ese jiberdi
NUR-SULTAN. QazAqparat - Fýtboldan 19 jasqa deıingi Qazaqstan jáne Armenııa jastar quramalary joldastyq kezdesý ótkizdi, dep habarlaıdy QazAqparat tilshisi.
Atalǵan kezdesýge qazaqstandyq quramanyń aǵa bapkeri Vahıd Masýdov tómendegi oıynshylardy alǵashqy mınýttan jasyl alańǵa shyǵardy: Danıla Karpıkov (qaqpashy), Baýyrjan Rahmet, Davron Zakırov, Oljas Ádil, Álıhan Óteshev, Ámir Tileýbekov, Muqaǵalı Pańgereı, Álı Turǵanov, Vadım ıAkovlev, Mýrodjon Halmatov, Abzal Qalaý (kapıtan).
Kezdesýdiń birinshi kezeńinde esep ashylǵan joq. Ekinshi kezeńde armenııalyq fýtbolshylar alǵa shyqty.
Ony 52-mınýtta Araık Eloıan óziniń enshisine jazdy. Budan keıin tablodaǵy esepke ózgeris engen joq.
Qazaqstan jastary qarsylasyna 0:1 esebimen ese jiberip qoıdy.
Endi eki qurama 16 aqpanda Armenııa astanasy Erevanda taǵy bir márte sheberlik baıqasady.
Eske salsaq, budan buryn fýtboldan Qazaqstan sýperkýbogy 2 naýryzda elordada ótetini habarlandy.
