Fýtboldan Qazaqstan jastar quramasy Qyrǵyzstanmen joldastyq kezdesý ótkizedi
NUR-SULTAN. QazAqparat - Elimizdiń 21 jasqa deıingi jastar quramasy 24 naýryzda Qyrǵyzstanmen joldastyq kezdesý ótkizedi, dep habarlaıdy QazAqparat tilshisi.
Oıyn Talǵardaǵy ulttyq quramanyń bazasynda ótkiziledi dep josparlanyp otyr.
Aıta ketsek, jastar quramasy 2023 jylǵy Eýropa chempıonatynyń irikteý týrnırinde kezekti oıynyna daıyndyqty 18 naýryz kúni bastaıdy.
Talǵarda oqý-jattyǵý jıyny ótkiziledi.
Qaırat Nurdáýletov jetekshilik jasaıtyn qurama Qyrǵyzstan olımpıadalyq quramasymen joldastyq match ótkizýdi josparlap otyr.
Kezdesýdiń bastalýy elorda ýaqytymen 17:00-ge belgilengen. Eki jaqtyń kelisimi boıynsha oıynnan tikeleı kórsetilim bolmaıdy.
Aıta keteıik, Qazaqstan Eýropa chempıonatynyń irikteý týrnırinde Shotlandııamen kezdesedi.
Bul resmı oıyn 29 naýryzda Almaty qalasyndaǵy ortalyq stadıonda ótedi.
Ótken jyldyń 12 qarashasynda ótken alǵashqy kezdesýde Shotlandııa jastary qazaqstandyq fýtbolshylardan 2:1 esebimen basym tústi.
Eske salsaq, irikteý týrnırinde Qazaqstan jastar quramasy I tobynda synǵa túsedi. Qarsylastary - Belgııa, Danııa, Shotlandııa jáne Túrkııa.
