Fýtboldan Qazaqstan jastar quramasy Ózbekstanmen oınaıdy

ASTANA. KAZINFORM — Qazaqstan fýtbol federatsııasy men Ózbekstan fýtbol qaýymdastyǵy U-21 jastar quramalary arasynda eki joldastyq oıyn ótkizý týraly kelisimge keldi.

Bul jóninde Qazaqstan fýtbol federatsııasy málim etti.

Matchtar 12 men 14 qazan kúnderi Tashkentte ótedi.

Aıta keteıik, Qazaqstan jastar quramasy D tobynda Anglııa, Irlandııa, Slovakııa, Moldova jáne Andorra quramalarymen oınaıdy.

Olar 5 maýsym kúni Astanada Andorradan 1:0 esebimen basym tússe, endi 8 qyrkúıekte Anglııamen sheberlik baıqasady. Al 9 qazanda 2027 jylǵy Eýropa chempıonaty irikteý kezeńi aıasynda syrt alańda Andorramen oınaıdy.

Qurlyqtyq dodanyń irikteý kezeńi 2026 jyldyń 6 qazanynda máresine jetedi.

Eske salsaq, budan buryn almatylyq «Qaırat» fýtbol komandasy UEFA Chempıondar lıgasy ekinshi irikteý kezeńinde Fınlıandııanyń KýPS komandasyn jeńip, jarystyń úshinshi kezeńine joldama aldy.

Endi olar Slovakııanyń «Slovan» komandasymen sheberlik baıqasady. Alǵashqy oıyn 5 tamyzda Almaty qalasynda ótkizilse, 12 tamyzda Bratıslava qalasynda bolady.