Fýtboldan Qazaqstan jastar quramasy Andorradan jeńildi

ASTANA. KAZINFORM — Fýtboldan 21 jasqa deıingi Qazaqstan jastar quramasy 2027 jylǵy Eýropa chempıonatynyń irikteý kezeńi aıasynda Andorraǵa qarsy match ótkizdi. 

Kezdesý barysynda qarsylastar tartysty oıyn ótkizdi. Alǵashqy mınýttan jyldam gol soǵatyn múmkindikti izdedi. Soǵan qaramastan biringi kezeńde tablodaǵy esepke ózgeris engen joq.

Ekinshi kezeńde andorralyq fýtbolshylar belsendilikti arttyra tústi. Nátıjesinde olardyń qatarynan Ivan Domıngýs 67-mınýtta mergendik tanytyp, óz quramasyn alǵa shyǵardy.

Otandastarymyz budan keıin tarazy basyn teńestirýge umtyldy. Degenmen dittegen maqsatyna jete alǵan joq.

Osylaısha qazaqstandyq jastar qarsylasyna 0:1 esebimen ese jiberdi.

Jastar quramasynyń oqý-jattyǵý jıyny 3 qazanda Almaty qalasynda bastalǵan edi.

Sondaı-aq olar 12 jáne 14 qazan kúnderi Tashkent qalasynda Ózbekstan jastar quramasymen eki joldastyq oıyn ótkizedi.

Aıta ketsek, qazaqstandyq jastar D tobynda synǵa túsip jatyr. Qazirge deıin óz alańynda Andorrany (1:0) jeńse, Anglııaǵa (0:2) ese jiberdi.

Endi otandastarymyz 13 qarashada syrt alańda Slovakııamen kezdesse, 17 qarashada óz alańynda Moldovany qabyldaıdy.