Fýtboldan Qazaqstan jasóspirimder quramasy Ázerbaıjannan jeńildi

ASTANA. KAZINFORM — Qazaqstan 17 jasqa deıingi jasóspirimder quramasy joldastyq kezdesýde Ázerbaıjanǵa ese jiberdi.

Qazaqstandyq fýtbolshylardyń Gabala qalasynda Ázerbaıjan jáne Grýzııa quramalarymen eki joldastyq match josparlanǵan. 

Alǵashqy oıynda olar Ázerbaıjanǵa 0:2 esebimen jeńilip qaldy. 

Endi olar 8 maýsymda 12:00–de Grýzııamen oınaıdy. 

Elimizdiń jasóspirimder quramasy 28 mamyrdan bastap oqý-jattyǵý jıynyn bastady. Alǵashqy oqý-jattyǵý jıynyn Talǵar qalasynda ótkizdi.

Bul quramaǵa aǵa jattyqtyrýshy Baýyrjan Saǵyndyq jetekshilik etedi.

Sondaı-aq elimizdiń 19 jasqa deıingi jastar quramasy 31 mamyr men 10 maýsym aralyǵynda Shymkent qalasynda oqý-jattyǵý jıynyn ótkizip jatyr. Josparǵa sáıkes úsh joldastyq match qarastyrylǵan. Aldymen «Ońtústik Akademııasymen» oınasa, odan keıin búgin, 7 maýsymda «Turan» fýtbol klýbymen sheberlik baıqasady. Al 10 maýsymda «Ordabasy» klýbymen kezdesý ótedi.

Eske salsaq, budan buryn fýtboldan Eýropa chempıonatyndaǵy Qazaqstan qyzdar quramasynyń qarsylastary anyqtaldy.